Zomi te peen Leitung ah ipian cilpan kipan Zomi te kihi napi in Khang khat khit khangkhat ongthak toto in thumuhna leh pilsina khualzinkhiatna ongkhan semsem nahaang in tu hunhun ciang Zomi ihihna kimang ngilh hiaihiai ta in, Pawl khat ten I minam minding in Zomi kipsak ni acisansan tawh, Pawlkhat ten mihing ihihna a mi teng nusia in a Zo bek ala tawh, pawlkhat bang in Kawlte lak ah alaai sin hun ongsawtsim ahihman in Zomi bang theinawnlo in Chin mah akisa tawh hambang vaai in I am mangsiang dektak ta hi.
Zomi te peen ipu ipa khang a kipan in I et suksuk ciang in ipianzia peen gaaltaai a tunidong athapaai minamte ihihi. Taangthu guipai itomlaak kikpakciang China gampan kawlgam ah gaal kitaaito a, Kawlgam sung nangawn ah zong munzang leitanghoih om hi napi in Kawlte leh namdangte in onghawl mang uh ahihman in mipai noplohna kenkawm , kawl kawm, guamlak ah kiteeng hi. Kenkawm , kawl kawm, guam kawm na ngawn a iteen tuhun ciang ongkithei ta a , Kawlten ongbuluh to leuleu in, Gaal kaap tangvaal bekbek ongluhto sak in igamte ongkeek uha, porter , naseem ongkaai laai uh ahihman in kithuak zolo in Gamdang khawng ah adil asaai in gaal kitaai keek suak laailaai hi. Tua ahihman in Hun ongpaitoto leh maailam ah Zomi te igaal taainading munpeen kangaihsunsun a Khapi tung, Vantung gam leh Hell cih hih gamthum bek kamulaai hi.
Tukhawng in kawlgam ah omlaai in ataikhia naailo pawlkhat te in Kawlkumpi alaulo buaina aneilo kisa kha thei uhhi. Ataktak in tuabang mite peen kawlgam sung ah nasep neite, gampua ataaikhia zolote leh Kawlte ongsimdaan atelkhia zolote hizaw uha alaulo a utlo leh kawlte azo cihbang hituan samlo uhhi. Bangciang in kawlten ongsim hiam cihleh Nidang in Gunkhawm peen Zogam in huam napi in tun kawlten Tai 9 nuaisiah ongkeekkhin uhhi. Kawlpi khuasung khawng a teeng Zomi te bang kawlte vaaithaang a a awkkhin ahi uhhi.
Zomi te koikoi ah iom zong in Zomi ihihna beingeilo ding a, zong kikheel ngeiloding hi. Ahizong in Zomi hikhin lel kahihman in cipong in ei le ei nangawn Zomi kici nawnlo in mindang ahihkeh mi ongpiak minkhat peuhtawh ilungkim khaak aleh Zomi ihihna kuaman ongtheihpihlo ban ah iminam mangthangding hi. Zomi ihihna ongkitel theihnading in , I beh le iphung theih kuul masa a tuakhit ciang ikhua itui ipu ipa piannakhua telkuul hi. Ultung sakding pahding cihna hilo hi. Zomi tepeen Pau le haam awsuah in unau sanggam ihihna, iminam onglakkhia hilo in ibeh in unau sanggam ihihna, iminam onglakkhia hizaw hi. Tua mahbang in ikhua icihciang in tulaai tak a omna khuapeen ikhua kicilo in ipu ipa pianna khuapeen ikhua kici zaw hi.
Zomi te peen ngeina kician anei minamte ihihmahbang in ingeina te ihihtheihzah leh tuhun tawh kituakdaan a izuih kuulmasa ahihi. I ngeina te kitheih kheem mawhbawl in maangdaan cihmah, akhangto gamdaan cihmah bangmah thei in mi a izuih peuh mah a leh iminam min ongthei cihthadah midangte minam asuakding ihilel hi.
Tua ahihman in Zomi ihihna ongkitheizawk nading in ei mahmah in ibeh iphung, ikhua ipau ihaam te leh ingeina te mangngilhlo in thupisak masading hihang. Tua khitciang hoihlohna tawh Zomi kilangsakloding hihang. ( Malaysia ka omlaai in UN zumpi maai ah Refugee ngending a kigual Zomi 2 kongcing Nepal ten nahawlkhia den uh ahihman in atawpna ah aheh uh suak hiding hiven zingsang nai 2 pawl sim in UN zumkong maai ah ek natha den uh a khatvei kongcing Nepal ten naman in aminam adot uhciang Zomi naci uh ahihman in Tua a kipan UN kongcing Nepal ten Zomi te gamtat hoihlo te ektha te ci in ongthei mahmah uhhi.) Zomi ihihna kilangsakding ici tateuta zong in hihbang liang zong ongnuam khin samlo zel hi.
Leitung ah minam tawm mahmah napin aminthang mahmah leh akithei mahmah minam peen Israel minamte ahi uhhi. Banghang hiam cihleh leitung pianzawh Pasian lawm suak a Pasiantawh kilawmta minam Israel te bek ompan hi. Tuaban ah Israel te in aminam uh itmahmah uha, Pasian kamsang minthang kheempeuh leh makaai kheempeuh minam it in minthang khin uhhi. Pasian lah amau it Pasian inlah amau it amau lah aminam uh it ahihman in leitung ah akitheipeen minam leh aminthang akhangto peen minamte ahi uhhi.
Zomi te leuleu peen Pasian lawm ciang bek hilo in Topa Jesu onghehpihna hang in Pasian tate ihihi. Lawm leh Ta koi ki it zawding hiam cihpeen mimal kimtek in ingaihsuntheiding hi. Tua ahihman in Pasian in Zomi te ong it mahmah cih kimuhthei hi. Pasian lawm cihna angah Israel mite nangawn khangto in pil in leitung ah kithei mahmah a banghang in Pasian ta ihih ban ah Pasian it mahmah ahi Zomi te pillo khangto lo, midangten ongtheilo in gaaltaai in thapaai mawk ihihiam??????? Zomi ten Pasian I it zahding a it zolo ihihi. Zomi apil sunsun in iminam min nagen ngamlo uhhi.
Zomi te peen Pasian thu zong ithei mahmah a Sia tampi tak bang Laisiangtho sang akah nading uh Leitung ah omnawnlo liang a Laaisiangtho sang mahmah zong aneih in kinei zihziah khin ta hi. Lai Siangtho Siam mipil peen bangzah ta in ki hau hiam cih leh Dr nasep neilo nangawn kinei ta a, mun khat kapai na Pawlpi bang ah Pawlpi mi kheempeuh avek a Sia , Keilah Sia Khawm Pau ong cilai uh ahihman in kavek uh a Sia vive kahihman un Kha in Naseem theilo hi. (Malaysia gam ah Zomi te biakpiak kikhopna Pasian thu um in azui ngeungeu Pasian mizat micitak pawlkhat te in ZCF Canaan kum sawtpi laaipekpan nakipan uhhi. Tuazawh sawtkhop khat 2006 pawlhiam khat ah ZCF Zomi cihpeen neulua ahuamna zaaikeilua ci in Myanmar Mission Church cihkhat kiphuan leuleu hi. Tuazawh asawtlo 2007 kiim ah kalaisai Myanmar Ciang bek peen neulua ci in International Zomi Christian Church cihkhat ong kihong leuleu hi.
Zomi te in Pasian thu telpi in kitel in Leitung bup level vanholh liang in na kiseem napi in athu kizui taktak naailo in Pasian ong it na kithei in en ki-it taktak naai lo hi. Leitung pilna lam ah zong mipil kitam mahmah ta in kipawlna zong tam mahmah ineikhinta hi. Kipawlna bang tam lua ahihman in leitungbup in Kipawlna makaaipi te peen President cih za ciang Bek pia in she uh himah leh Zomi te Khuapi Lamka bang ah President of President inei Ta hi.
Leitung ah Korea gam te in Pasian a it mahmah man un tu in UN General Secretary in Ban Ki Moon Korea mipa tuta in kideihmahmah sawnsawn hi. Korea te vanbawl ahi Sam Sung cih te akipan Korea itna Ngaihna Video cihte Leitung in deih mahmah a, Gamneu minam neu khat ahih uh hang Leitung in thei in minthang mahmah uhhi. Hih Korea itna Ngaihna Video te bang , bangzah in minthang hiam cihleh Zomi Pastor khat bang in athu ngetna ah Topa aw hih Korea Itna video te TV ah apai laai teng ong painaai ken ci kici hi. Naseem atawlngak sim un Thungetna mualtung ah pai uh a Pasian tung kiko in bok in kap in Pasian a itna uh lak uhhi. Ameel mahmah uh zong hoih in, ahoih dan tumdang phadeuh in nahtang paak leh Mauzuang mahmah bang uh hi.
Pasian it mahmah in Topa Jesu suahna alak aksi pi te zui a Topa Jesu avadelh nitumna lam gam te tuni dong minuai ah omlo uhhi. Pasian a it mahmah man un, Zomi te lak bang ah missionary ongkhah Khia uh a Ganhing abang lian Zomi te mihing bang in ong nungtasak baan ah a nungta Pasian ongthei sak, USA te Leitung uk cileeng kikhial lophial ding a asum te un man nei in lian mahmah a amizong lian in zong pil mahmah uhhi thahaat mahmah uhhi.
Pasian a-it lo gam ahi kawlgam enpak Leeng Leitung ah minthang mahmah in apil ahi U Thant, Aung San ,Suu Kyi te omnapin amimal mahmah leh a mipi te in Pasian itlo ahihman un Pasian in nasep theihna pialo ban ah Leitung a ding bangmah seem khalo uh a Vaak kawn Sia ciang tawh nitum Lel uhhi. bang zah ta in Kawl ten Pasian itlo hiam cih leh amau Pasian apiak tawm uh Phungzi Lutol te bang Ann lim nono piapia in zahtaak bawl sim zaw zen uh a Hun asak uhciang ,athau deuh uhciang emkaang mang Lel uhhi. Hih Lutol te Pasian bawl sa cih phawk Lo uhhi.
Laisiangtho sung a Kumpi Abraham nutaakna tawh thala in Zomi ihihna mite tung ah kithei khiasak ding hihang. Abraham peen Pasian a it mahmah ahihban ah Pasian cih bangbang amang mipa ahihman in Pasian in it mahmah a tuni dong in aminamte leitung ah aminthang peenpeen in Pasian in koih hi. Abraham peen Pasian in Israel minam a abawl ahihmah bang in Chin khawng naki haihai lo in Israel mimah tawh nasi hi.Tua ahihman in Zomi te in zong ipa ahi Pasian it mahmah in athu mangding hang a eideihna thupisaklo in Pasian kammal bang leh amasawlna bang in gamta kawm in iminam it le hang in Zomi te peen leitung ah ong kithei in tu a upna tawh ilaak kholhkholh Zomi te Minam lian icihcih te ong taangtung ding hi. Kahna tauna Pasian thumanna, Pasian itna tawh Zomi upgrade ni ‘’’’’’’’’’’’’’’’’’’’’’
Zomipau
