Monday, May 26, 2014

Tulaai Leitung Thuthang Tuamtuam Updates May 26, 2014

Tulaai Leitung Thuthang Tuamtuam Updates May 26, 2014


·      Zomi sung ah Pasian mizat mahmah leh iminam makaai khat ahi Rev Pau Khan Khai leh Sianu Niang Go Man te in akiten zawh uh kum 18 cin Topa tung lungdamkohna pawi May 25 ni in asangkahna uh ahi Louisville khuapi ah nopcitak bawl uha sak pan khang pan mi kipaizihziahahihman mipi inn dim mitmet hi. Kei zong vakihel kha kahihman in angtang kakisa hi. Siapa te Innkuan Pasian angvan zia leh Pasian amuanzia uh kamuh ciang kakhi tui taak kelhkelh in khasiangtho alamdang tak in na ongseem hi. Apai mimal kheempeuh Siapa te innkuan in ann lim mahmah tawh ongvaak uhhi. Anuai ah YouTube video tomno na etsak hamtang in.


·      Bang tuak liang uh hiding hiam South Korea gam ah Seoul Khuapi sung Bus khawlna phualpi khat May 25,2014 ni in meikaang leuleu a mi 7 si in 20 liam uhhi.

·      US President Obama May 25,2014 ni in Afghanistan gam vazin a Gaalkaap te kiang ah igaaldo saupeen peen ahi hih Afghanistan galdona tukum beiciang ihialbawl taktak tading ci ahihman in gaalkaap te nuam kisa in awng ziahziah uhhi.

·      Daw Aung San Suu Kyi makaai ijn NLD makaai te in 2008 kawlgam thukhun puahding mipitung ah agenna uh ah Unglua ahihman in kidawm un ci in Election commission U Tin Aye in laaipia a, U Thein Sein tawh kilawmta naseem khawm kahi uhhi cihbeh gawp himah leh NLD te in anasep uh zomsuak ding in May 26, 2014 ni in khensat uhhi.

·      Ukraine gam nisuahna lam a om Donetsk khuapi Vanleeng tual Russia deih thautawi te in ukcip uh ahihman in May 26, 2014 ni in Ukraine gaalkaap ten vanlam pan nasia tak nuai uh a, sutkik uhhi. Tulaaitak Ukraine gam kiteel laaitak zong ahihi.

·      April kha 14 ni a kiman Nigeria sangnau pang numei no 200 vaal te asuah taaktheih nading un Nogeria kumpi te in Boko Haram kigilo te tawh kihoding in ngetna May 26, 2014 ni in bawl uha, lemtheiding in lam etna nei uhhi. Nigeria gamsung a kiman Islamic migilo teng khah le uh Naupangno pawlkhat ongsuakta theiding in gen uhhi.

·      India gam Uttar Pradesh state sung Gorakhpur khuapi pan Haryana state Hisar khuapi ataai amanlang meileengpi khat May 26, 2014 ni in apeitaalkhia in kibung ahihman in mi 20 si in 83 nasia tak in liam uhhi.

·      New Delhi khuapi sung ah ahileh May 26, 2014 ni in Prime Minister ngahthak Mr Modi gualzawh pawipi leh kiciamnapawi nasiatak in kibawl in Hindu biakna bia mipi te leh India gam makaai pawlkhat te lungdam kisa in Didi dada sa ziahziah uhhi.

·      Pope Francis Middle East kual akhual zin anithumna leh atawpna ni ahi May 26, 2014 ni in Jerusalem khuapi sung a om Western Wall kici mun ah vapai in mipi tetung ah kua biakna kua biakna cilo in kilemding agenkhitciang Western Wall lenkawm in thungetna nei hi.

·      Haksatna lianpi kawmkaal ah Maailam khualna tawh makaai hoihpi khat ongpiankhiat theihna ding in Egypt gam mi millions asim te in mee piak May 25,26 ni pan mee piak kipan ziahziah ta uhhi. gaalkaap maangpi lui Mr SiSi bel ngahding kilam en leulau mahmah bilbel hi.




Lungdam ei
Thang Khawm Pau Zomi



Sunday, May 25, 2014

Tulaai Leitung Thuthang Tuamtuam Updates May 24, 2014

Tulaai Leitung Thuthang Tuamtuam Updates May 24, 2014


·      Myantungmi thautawi makaaite ahi U Nai Han Tha, U Khun Ohka , U Tun Zaw te le Kawlgam Democracy makaaipi Daw Aung San Suu Kyi te May 23 ni in Yangon khuapi ah kimukhawm in Kawlgama masuan ding tawh kisai kikupkhopna khat nei  uhhi.

·      Kachin gam Mitkyina khuapi pan tai 45 akigamlaatna mun ah pan kipan in May 24, 2014 ni  zingsang lam in 5.5 thahaat zinling a mi asi aliam leh inn sia lo sia bangmah omlo hi ci in Kawlgam kumpi thunei te in taangkokhia uhhi.

·      USA gam California state Santa Barbabara Khuasung a om California University huang sung ah BMW mawtaw tawh Tangvalno kum 22 aphapan khat May 24, 2014 in ongkhawl vat in akiim apaam a te thautawh bankaap ahihman in mi 7 si in 7 liam uhhi. Sangcing palik ten zong amah na leh kap pah uh ahihman in amah zong si hi.

·      Monday May 26 niciang akibawlding India Prime Minister thak Mr Modi I kiciamna pawipi ah alamdang mahmah in gamveeng Pakistan Prime Minister Nawaz Sharif zong kahding hi ci in Pakistan thuneite in May 24, 2014 ni in taangkokhia uhhi.

·      Thailand gam ukna abuluah gaalkaap kumpi te in Thailand gam ading politics aseem mi PM lui Yingluck leh mi 100 vaal amatkhit uhciang May 24, 2014 ni in acianlaai mi 35 te amau le amau ki-ap ding in thupia leuleu uhhi. Hih akiman politician te peen ngaihsutna hun angahtheih nading uha kikeemcing hizaw ci in gaalkaap kumpi in genkhia uhhi.

·      Ukraine gam te in Dawi havang kaal ah gambup President kiteelna nasiatak bawlthei uha, Candidate mi 18 te nasiatak in mee akipia ziahziah hia, Monday May 26 ni in kitelding in kilam en hi.

·      Pope Francis in zing May 25 niciang Topa Zeisu khualui ahi tun West Bank te khuapi Bethlehem khuapi a om mi 8,000 bang akikhop denna pawlpi ahi Nativity pawlpi ah hunzang ding a, tuakhit ciang Israel gam Tel Aviv khuapi leh Jerusalem khuapi te ah hawhsuak ding hi.



Lungdam ei

Thang Khawm Pau Zomi

Saturday, May 24, 2014

Pu Khup Suan Thang te lungdam kohna pawipi


Pu Khup Suan Thang te lungdam kohna pawipi

Pu Jasuan Kawte beh Pu Thawng Za Vung tapa anau zaw Pu Khup Suan Thang leh Pi Lun te in Pasian mintawh akiteen zawh uh kum 25 cina leh Topa thupha piakna lungdam kohna pawipi Florida state,USA gam ah May 19 ni in nopcitak in bawl uha, State tuamtuam pan tanau te leh Florida state a teeng Zomi tampi tak te lungdampihna muakna nei thei uhhi.

Pawipi sung ah alamdang tak in Pasian in naseem a, Innteek lampan lam etna saang in mitam paizaw mahmah ahihman in Hotel Khan akawmna uh neulua mi kita zolo ahihman kawmbeh in Hotel khan te kikhan hi.


Pu Thang & Pilun te khansawt damta hen

Tulaai Leitung Thuthang Tuamtuam Updates May 23, 2014

Tulaai Leitung Thuthang Tuamtuam Updates May 23, 2014


·      May kha 27 pan kipan in NLD te in 2008 Kawlgam thukhunpi nambat 436 bawlphat nading mipi suaikaihna Nypidaw khuasung khak 5 ah nasia tak in kaaikhawmding uha, Gaalkap te innkuanpih te  leh mipi teel taangmi te in suaikaihna aneih theih nading in geelna nei uhhi.

·      Kawlgam Mualtungmi thautawi kilemna bawl palaai NCCT te leh Kawlgam kumpi kilemna bawlpawl Yangon khuapi ah kimuhkhopna May 23, 2014 ni in hialbawl uha, langnih thukimna laai ahaampi anihveina khat bawlkhia zo uhhi. Hih laaipi NCCT in Mualtungmi thautawi pawlte lakding a ongtungding June kha sung ah Kawlgam kumpi kilemna bawlpawl tawh kikumding uhhi. Tutung in Mualtungmi te thuluikhiat ahi Federal System cihpeen Kawlkumpi in ongsangzota zong ahihi. Hih Federal System peen ZCD te lui masak zong ahihi.

·      Pope Francis Nithum sung Middle East kual khualzin na May 23, 2014 ni in kipanta a, Jordan gam tungta hi. Israel-Palestinian kikaal ah zong zawltuah seemding a, Nipi niciang Topa Zeisu suahna Bethlehem khua ah zong zinding hi.

·      Thailand kumpi in gambup thuneihna aluahzawh ani nih na May 23, 2014 ni in X-PM luui Yingluck Shinawatra leh anaaihuai pawlkhat akihel gamvaai naseem 100 vaal man uha, Gamvai naseem 155 te zong gampua pusuak theilo ding in khaktan uhhi. zan nai 9 pan zingsang nai 5 dongkua mah pusuakthei loding, mi 5 tungsiah omkhawm theiloding cinapi uh in May 23 ni in Bangkok khuapi sung ah mivaakziahziah ahihman Gaalkaap athuang athuang in munla ziahziah uha, Gaalkaap adeihlo lungphona bawl mipi te tawh kivat ziahziah uhhi.

·      Leitung a kum tampeen nihna Pi Jelalean Talley in kum 115 acina pawipi ateena Michigan state ah May 25 niciang bawlding in taangkokhia hi. Pinu peen 1899 kum May 23 ni in Georgia state Montrose khua ah piang ah 1935 Michigan ah kituah in 1988 kum in apasal in nusia hi. Leitung a kumtampeen Japan te  Misao Okawa hi a, kum 116 phata hi.

·      May 7 ni  a South Africa gambup kiteelna ah African National Congress party in gualzawhna ngah ahihman President Jacob Zuma a term nihna kum 5 president ding in Party in May 21 ni in kipsakna nei uha, May 23, 2014 ni in kiciamna leh pawipi khaamna nasia tak in nei hi. Gamtuamtuam pan makaai 4,000 bang in muakna nei uha, President Obama in May  17 ni in President Zuma phone tawh lungdampihna genkhin ahihman palai paisaknawnlo ci in White House ten taangkokhia uhhi.

·      Thailand gam gaalkaap kumpi in a uk zawh ninih ni May 23, 2014 ni in US ten Thai gaalkaap te ahuhna uh $3.5 million kikhawlphot ci in taangkokhia uha, Thai gaalkaap ten gam vaaihawmding mipi nawhtak a aseh nading un ngetna bawl uhhi.

·      Ongtung ding May 25 niciang a kibawlding Ukraine gam Presidential kiteelnapi  tawh kisai in kathukimpih a kiteelna tawh kisai apiang bangbang hoih kasa ci in Russia President Vladimir Putin in May 23, 2014 ni in genkhia hi. Ukraine kumpi vaaihawmna tawh kisai athukimna amasapeen zong kici thei hi.



Lungdam ei

Thang Khawm Pau Zomi