Syria Tualgaal vaai koiciang tungta
• US taangmi Senators te in 9/3/13 ni in Syria gamtawh kisai kikupnawina White House ah nasiatak in nei uhhi. Avekpi un Syria gam gaalkaap thatawh doding in thukimna nei uha, Maaikaal sung ah kalsuanzia ding ani akha geelkhiading in thukimna nei uhhi. Ahizong in Hih gaaldona peen ni 60 sung ciangtan hiding a President Obama in Congress te I thuphapiakna deih ingci ahihman in Congress thukimna la masa ding hi. Gaal dozia ding peen atamzaw thukimna ah Iraq gambang in dopaat mang in sawtpi vabuaipihding hilo in Syria gam kumpi langpang te zawhlohna munteng Vanlam pan nuaisak pak in Kumpi langpang te Zialbeh sakding cih thu ahihi.
• Hih ni mah in Senators meeting sung ah Syria gam doleeng bangteng piangding cihthu te Secretary of State John Kerry, Defend Secretary Chuck Hagel leh Gaalkaap maangpi Gen Martin Dempsey te kihel uha, avek un tetti panna , thudotna Senators te in nei uhhi.
• Pressident Obama in Congress makaaipi te 9/3/13 zinsang lam in kimuhpih a ciangtanna tawh Syria gam idoloh phamawh hi ci in hantawn hi. Suun lam ah Senators tetawh kimu in 9/3/13 zanlam in Russia gam ah kibawlding G20 khawmpi kahding in Sweden gamlam zuan in leengkhia a zing an zong nemanlo hi. Obama in Syria gam doding tha acialna pan White House pan gualzawhna angah suak a tun Congress Gualzawhna angahding bek kisam laai ahihi.
• Syria gam tualgaal tawh kisai in mitampi asihnathu President Obama leh Japan Prime Minister Shinjo Abe te phone tawh 9/3/13 ni in kikum uh a , apatauhna thu uh apulaaktuak kawm un khut khat tawi khekhat khai bang a kalsuanding in kithukim uhhi. Tuaban ah hih Syria gam dona ding in 9/4/13 niciangciang, US mipi 10 lak ah 6 in thukimna neita uhhi.
• French President President Francois Hollande in President Obama in Syria gam gaalkaap thatawh doding geelna aneihna te thukimpih a ahizong in hih Syria gam in Chemical gaalvanzang in kaute do cihthu te akitelciang dawnna kineipanding hi ci hi. Ahizong in Congress te thupha piakna mahtawh kagamtading hi ci in 9/3/13 ni in genkhia hi. Tuaban ah Europe gamkheempeuh in hihthu ah ommawkmawklo a gamtaangkhia ding in hansuah hi.
• UK Prime Minister David Cameron in zong ama mimal in Syria gam gaalkaap thatawh doding a Presient Obama geelna thukimpih mahmah a ahizong in kaamsiatnatawh Congress te in na nialsan uh ahihman in dinkhawl hi.
• Israeli Prime Minister Benjamin Netanyahu leuleu in President Obama in Syria gam gaalkaaptha zang a akhentatna hoihsa mahmah in alungdamna 9/4/13 ni in pulaakkhia hi. Tuaban ah Defense Minister Moshe Ya'alon kian ah I Innpi US te hungaih kawm in Khai! Tangvaal itemtawng itemta te guangguang ta sin vua ci hi.
• UN Security Council member teng in 9/3/13 ni in thukin thukikupna khat nei uh a, Tua mun ah UN General Secretary Ban Ki Moon in UN Chemical gaalvan kantelte kantelna tu kaaptawp ah kitelding a tuakhitciang UN security Council thukhun ombang in ikalsuanding ci in member te hanthawn hi. Tuaban ah US te kilaaisan zong thupoizaw suakkha theiding paizia maantakkei lawpbaihlua uh ci in pulaak beh hi.
• Syria gam tualgaal hang in Inn le lo neilo cihmawh mi 2.25 million phata a, gampua ah taai in UN micimawh huh UNHCR te kiang ah min apia mi 2million cingta hi ci in UNHCR te in 9/3/13 ni in taangkokhia uhhi. Gampua ataai mici mawhte peen adiak in Lebanon, Iraq gam leh Turkey gamte ah bukna zong uhhi.
• Russia President Vladimir Putin in UN phalna omlo in US te amawkgamtat peuhmah uhleh bel ci in 9/4/13 ni in “Warn” vau hi. Ahizong in US ten UN phalna omlopi a Syria amawkdo leh Russia in bangcihding cihthu pen genleeng genbaih luading kahihman kagen naaikeiding hi ci hi. Aman agenzeelna ah Syria gam in Chemical gaalhiam zang in gaal adotakpi ahihleh dik kasa tuankei a ahizong UN khensat bangbang in kalsuanding paizai man ahihi ci hi. Tuma in Syria gamte S-300 thaupi daalna namte tawh kahuh uh a ahizong hibang in Chemical gaalhiam zang cihthu ong omciang ka dinkhawl phot uhhi ci hi.
• Israel leh US te leuleu mi buaikawm kaal ah thutuampi khat in onglehtat vaanglak uh a, Si tuipi dungto ah thaupi lawn in gamnih gaaldo kisinna thalaak na 9/4/13 ni pan kipan ziahziah uhhi.
My opinions (Ka ngaihsut nate)
Hih atung thu teng I etkaak bilabial khitciang, UN te peen Syria kumpi diklohna mugegu thei gegu in gaal deihlo ahihman in kihemhem ta tawh kibang kasa hi. Tuaban ah amawhna mu in UN security council in gaalkaap tha zangh in luutding hileh Russia,China in Veto zang in khaktanzeel lelding peen muhsa ahihi.
Tua ahihman in US te in UN thukimna laak kuulsalo laak leh laakloh kibangsa uh ahihman in Congress thukimna angah uhleh ongkaapding uha, Russia te onghehding uhhi. Russia ongkihel leh NATO in thukimna ombang in gaal onghuhloh phamaw khading hi. Russia leh Syria gaal onglel pian leh amau phuaihteng ahi China, N Korea leh Iran ongkithawi ding uhhi. Tuakhit ciang Israel in Iran nanuai pheiding a, Japan in China, S Korea in N Korea aciangciang ah ong kinuai ziahziah ding uhhi.
Tuakhit ciang NATO+Japan+SKorea+Israel Vs Russia+Syria+China+NKorea+Iran ongkimawl ziahziah ding uha, leitung gaal gim ongnau veuveu in vanman khang in kial ongtung ding a “The Third World War ” kici Gaalpi thumna ongpiang zophial ding hi.
Laaimal kikhial kha aom leh ngaihdambawm ah maw ………………..
Zomipau
http://Buanli.blogspot.com
