Tulaai Leitung Thuthang tuamtuam updates September 3, 2013

Tulaai Leitung Thuthang tuamtuam updates September 3, 2013,

Zomi tawh kisai thuthang

·         Zomi sung ah International Level a ineih sun NGO ahi Pu Dr Chin Do Kham makaihna Global Outreach and Community Development ii innteek na tawh September 21 (Saturday) nitak 6:30pm in Tulsa khuapi aa om Union High School - Performing Arts Center ah "Zomi Gospel Concert USA 2013" nasia tak in kinei ding a hih man in, Tulsa khua sung aa om khuapih tuipih te leh muntuam gamtuam pan Zomi u leh nau te in a hithei bang aa  nongsiim ciat nading un kongsam uh hi. Mipi 2000 tutna Hall pi kikawm khin a hih man in, mun leh mual kicing ding in ki lamen hi. Hih pawipi ah lasading in Zomi sung ah Lasa siam Niangpi ( Kawlgam) JK Kam ( Norway) leh Kampau kizen Lengtong Kam Khen te ongpaiding uhhi.

·         Zomi sung ah Political Party ineihsun ZCD te hanciamna tawh ongtungding September 29 niciang in Zogam khuapi khat ahi  kawlpi ah Political Training thupi mahmahkhat kibawlding a tuamun ah   Gamgi a,thautawi makai te, democracy force te federalism training te kipiading hi. Thusinna sakding in USA pan Politics lamsang siam miminthang khat ongpaiding hi.

·         Zomi Laisiangtho sangnaupang honpikhat aomna Eastern Bible Collage Dimapur,Nagaland saang ah sangnaupang makaaite  leh Sangsiate sum le paai , laaihilh zia te tawh kikamtam uh ahihman in Buai uh a , saang kikhaakding maw  koiciding ci in abuaisaan laaitak uh ahihi. 

Kawlgam Sung thuthang

·         Kawlgamsung ah Biakna namkim ki uitui tak a khuasak khop theihnading ngimnatawh Karen state Ba-an khuapi ah akhatveina thukikupna 9/3/13 ni in kinei hi. Hih khawmpi ah Christian,Buhdha,Islam  leh Hindu  biaknate pan makaaite kah uh a ongtungding 9/10/13 ni ciang in kalsuanziading kician leh panmun gualhna kician neikikding uhhi.

·         Sweat Zealand gam a kiphualsaat ICRC te Kachin gam KIO te huangsung  Laiza khuapi ah 8/29/13- 9/1/13 niciang vahawhthei uha, Micimawh gaaltaai te omna camp te leh saang inn te ah vahawh thei uh hi ciin KIO te in 9/3/13 ni in genkhia uhhi.

·          Kawlgamsung Rakhaing state sung ah pilna lamsang a zat tangzang ding in Rakhaing state kumpi te tungtawn in India kumpi te in huhna sum $1,000,000  September3,13 ni in piakhia uh hi ci in Rakhaing state kumpi thuneite in pulaakkhia uhhi.

·         Kawlgam gaalkaap te leh Shan gam  saklam a kibusa Palong minam thautawi pawl TNLA te 9/2/13 ni zaanpan nasiatak in kikaap uh a khuasungmi 1 si hi ci in TNLA tei n 9/3/13 ni in genkhia uhhi. Hih kikaapna peen Kumpi tetawh kilkemna abawlzawh uh a 5 veina kikaap na hi ciin genbeh uhhi.

·         China gam a kibawlding Asia gam vanneih kilahna pawi ah vakahding in Kawlgam President U Thein Sein kawlgampan 9/2/13 ni in dingkhia a , apupi ahi china President pu Xi Jinping tawh zong gamnih kikaal vakihuau suausuau ding uhhi ciin kawlgam President zumte in genkhia uhhi.

Syria tual gaal koi ciang tungta 

·         Syria gam gaalkaap tha zang a dotheinading in 9/2/13 ni in White House ah Senator Mr John McCain , Lindsey Graham leh President Obama in ki muhkhopna nei in Susan Rice in thungaai hi. John McCain in inuai pak kei leh guai a ilawm igual ten ongmuang nawnloding a, USA gam a kipan Tulaai tak I President leh ineihlaaiding President te vaang kiam mahmah ding  hi ci hi.

·         USA Inn Kaangpi ah 9/3/13 ni in Innpi tanupi teng leh President Obama te thukikupna nei leuleu uh a , Party nih pan makaai kheempeuh in President Obama cihbang in gaalkaaptha tawh doding in mai ate cihbangbang ciziahziah uhhi.

·         Meeting sung ah  Innpi Haaitawi pipa   John Boehner, R-Ohio in USA gamte in Syria gam nawkzawhnading akicing tha inei hi. UN Security Council in gaalkaap tha tawh do sawmlo uhhi. NATO zong lawp zatzat lo mawk uh ahihman in eiding hive hang aw ci  hi. Ahizong in President pu Obama tung ah kinga hi aman amah mee apia mite azodiam kingaihsun hen ci hi.

·         Meeting sungmah ah US Minamneu te Haaitawipi nu Nancy Pelosi D-California in tu mahmah in kipan in doding hihang ido kei leh aw mihing nuntaakna thupi asalo hiding hang in kuaman ek a zong ongmuloding hi cihbeh hi.

·         Syria's U.N. ambassador, Bashar al-Jaafari leuleu in Syria kumpi in Chemical gaalvan zang a mipi tampi athahna peen khial mahmah mah hi ahizong in gaal ongtung taktak leh  kamipite buailuading, khai ! UN thukhun ommahbang in thudamtawh cidih vevua cici hi.

·         UN General Secretary Pu Ban KI Moon leuleu in kei hunsung a gaaltungding peen deih hetkei veeng aw kasam kaangta minsialua deihkeng , Kuamahmah in gaalkaap thazang in nakithawi naaikei dih un tukaal beiciang UN Chemical sittelte thu ongkician ding hiveh tangvaal aw ci in atal guaitiuteu ta hi.

·         Israel te leuleu in Syria gam US ten  ongkaap mengmeng lo uh a maw, hihcih ding hi cih ekding ci a Mediterranean tuipi tungpan  thau zangno ameekmeek uh leh ging takpi in kamphatna tawh Black Tuipi sung  lam tubilbel hi. Syria gam tawh kineh mahmah uh ahihman in Russia leh Syria kumpi te bang sibup dektak uh hih tuak hi. Amau bel US tawh kipawl a Kawlgiit thaupi Sparrow Missile cimphawng a alawnsin hi ung cipong uhhi.

·         Syria kumpipa Al Assad leuleu in US te ongkuanding hita amauthei bel vanlamtawh kaap bek hi. Na thaupi te uh koih ah mualsang zuansak  un Na bomb liantata uh phum un gil vahsa in om un kuamah ihmunawn kei un, Koi! Nangzong zia neiteh ci in Agaalkaap maangkhat bang bengkha hituak hi. A paam ah Penglam in lem in cia, lem in cia ci leh kilawm liang !

·         US Taangmi te thukikupna nasiatak aneihsaan laaitak uh hi a nitaak lamciang athukhensatna uh ongsuaksak kik ning ei

Leitung thuthang tuamtuam 

·         Egypt gam President za pan kilakhia Mohammad Morsy hang a lungkimlohna hang in gamsung buaina khawlnaailo a 9/3/13 ni in kumpi thuneite in buaina apiangsak Muslim Brotherhood te tawh aki  memat thuthaangkona TV station 4 te khakcip uhhi. Tuasung mah in Egypt gaalkaapte in Helicopter tawh Sinai mualdung a kibusa gambuaisak gamnuai mite zial ngekngek uhhi.

·         2011 kum zinlinna hang in akeh Japan gam Fukushima nuclear plan huk nading in  ice wall bawlkuul a tuading in kumpi te in abaihsa in $470 million geekhol hi ci in Government spokesman Yoshihide Suga in 9/3/13  ni in genkhia hi.

·         Indonesia gam ah $13 Million golhguuk neeksimna hang in Palik Bu aksi 2 Gen Djoko Susilo kum 10 sung thongkiading leh liau sum $ 45,000 piakha ding in Indonesia thukhenzumte in 9/3/13 ni in thukhen uhhi.

·         Leitung a computer lam ah aminthang mahmah Microsoft te in Nokia phone company bup $5.4 Billion tawh  leiding in 9/3/13 ni in thukim uhhi. 2014 kumciang vankileina kheempeuh siangtading a Nokia phone company a naseemmi 32,000 te Microsoft company naseem suaksak siangding uhhi ci in Microsoft chief executive Steve Ballmer in genkhia hi.

·         Iraq gam I khuapi Baghdad khuapi sung  Shia districts ah 9/3/13 ni in nasiatak in bomb puakkham a mi 40 si in 100 vaal liam uhhi. August kha sung bekbek in hihmunteng ah mi 800 vaal si uhhi.

Gennop tampi tawh hoih sakphot tawng ei

Thuumna: Laaimal kikhialkha leh laaimal kilawmlo, ani akha akituaklo kha akipan kisapna tuamtuam aomkhaak aleh ngaihdambawm ah nongnakhiat sak un maw

Zomipau

ZomiTV.com  ah na hawh peelmawh un

http://buanli.blogspot.com