Tulaai Leitung Thuthang
Tuamtuam Updates May 3, 2014
· 1990 Gualzawhna angah Shan Party SNLD leh 2010
kiteelna luut Shan party SNDP te kigawmkhop theih nading in Party khat pan
makaai 5 ta ongtungding May 10 niciang Taunggyi khuapi ah thukikup khopna neiding
in langnih pan May 3, 2014 ni in taangkokhia uhhi. Chin State sung a party teng
bel kigawm khopding mualmong et banglai hi.
· Amerian Democracy leh Human Rights lam Zalian nihna
Sarah Sewall May 5-6 Indonesia gam paiding a tuakhit ciang kawlgam zinsuak ding
ci in US thunei te in May 3, 2014 ni in taangkokhia uhhi. Adiak in kawlgam sung
Democracy naseem party, kipawlna tuamtuam te leh khangno te tawh kimukhawmding
ci uhhi.
· KIO kilemna vaaihawmpawl in May 2,2014 ni Mitkyina
khuapi ah Kawlgam kumpi kilemna bawlpawl tawh atuam kimuhkhopna ding angetna
tawh kisai in kumpi lampan May 13 hizaw leh ci in May 3, 2014 ni dongkik uha,
aniding langnih kipsakna nei naailo himah leh May kha sung in kimukhawm
theiding in lam en tuak uhhi.
· Afghanistan gam saklam Badakhshan District sung ah May
2 ni nasiatak mencipna hang in misi 3 leh ahing 7 bek kumpi ten honkhiazo uha,
mi 2,000 vaal mangthang laai ci in kumpi thuneiten May 3, 2014 ni in
taangkokhia uhhi. UN ten ahihleh mi 350 si in inn 1,000 kisia ci in May 2,2014
ni in taangkokhia uhhi. Acian laai te mencip kiding kilau ahihman kiheemkhia a
men vuhsa mite zong sikhin lelding a vuisa hipah in ngaihsun mai in kizong
zonawnloding hi ci in Palik Maang Faziluddin Hayar in May 3, 2014 ni in genkhia
hi.
· Ukraine gam Odessa khuapi sung ah May 2,2014 ni Russia deih thautawi te leh Ukraine gaalkap
te kikaap nahaang in Trade Union meikaang a mi 42 si in mitampi liam uhhi. Kua
khutma kitheilo himah leh Russia deih mipi te in kumpi lamte ngah uha May 3,
2014 ni in hihmun ah nasiatak in lungkimlohna lak uhhi. Hih buaina tawh kisai
in US secretary of State John Kerry leh Russia Foreign minister Sergei
Lavrov te phone tawh kiho uha, Mr Sergei
in Ukraine gaalkaap te khawlsak un ci in Mr Kerry tung ah ngetna nei hi.
Ukraine gam buaina hang in mipi 80 vaal sikhin a, US leh EU ten Russia mawhsak
uh ahihman muntuamtuam pan gaakding behtoto ding in thukimna nei uhhi.
· Smart Phone company lian mahmah ahi Apple leh Sumsung
pilna kiguksak buaina tawh kisai in California state San Jose Federal thukhen
zumpi pan Sumsung in Apple tung ah $119.6miliion piading in May 2,2014 ni in
thukhen uhhi. Abeisa hun in Apple in
$2billion ngen a Sumsung in $6million piading in akideekdeek uh ahihi.
· Somalia gam Mogadishu khuapi laaizang ah May 3, 2014
ni in nasiatak Bomb puakkham a mi 6 si in tampi liam uhhi. Hih bomb ko
puahkhapsak hiven ci in Al Qaeda tawh kipawl Al-Shabab migilo te in genkhiapah
uhhi.
· Thailand Election Makaai te in MP Ms Yingluck te in
July 20 gambup kiteelna bawlding ci a ataangkokhiatna uh kumpi langpang makaai
Abhisit Vejjaviva in kha 6 sung sottoding in May 3, 2014 ni in ngen a tua kha 6
sung in Ms Yingluck leh apawlte khawlding in ngen laai hi.
Lungdam
ei
Thang
Khawm Pau Zomi
