Tulaai Leitung Thuthang
Tuamtuam Updates May 22, 2014
· Kawlgam kumpi kilemna vaaihawm pawl leh NCCT
Mualtungmi kilemna vaaihawm pawl thukikup aninihna May 22 ni in nuamtak zo uha,
thulu 7 lah 5 ciang zawhbawl uhhi. May 23 zingsang nai 9 pan anih thumna leh
atawpna kikumding uha, langnih thukimna laai ahaampi khat suahkhia zoding in
kilam en tuak uhhi. Hih thukina laai azawh ciang NCCT leh Shan minam thautawi
RCSS/SSA, UWSA leh Maihla te kihel in Mualtungmi teng khatvei kituam kup
laaiding ci in NCCT makaiten genkhia uhhi.
· Thailand gam thunei kheempeuh tawh Thai gaalkaap te
ninih sung vaaihawmzia ding akikupna pan thukimna bangmah ngahzolo ahihman in
aninihna May 22 ni in Thailand gaalkaap te in Thailand gambuppi thuneihna luak
in Ukcipphot hi ci in Gaalkaap Maangpi Prayuth Chan-Ocha in TV pan in taangko
a, thukikum apai ulian teng mancip in Yingluck Shinawatra leh apawlte zong
ki-ap ding in sam uhhi. Tua ban ah zan nai 10 pan zingsang nai 5 kuamah pusuak
loding, TV ah Gaalkaap te a bek suaksak ding, mi 5 sang atamzaw omkhawm loding
cihthu khung uha, Thailand gam thukhunpi zong ihmu sakphot tadih uhhi. USA ten diksa hetlo uha, kawlgam ten ahihleh
tha ngah mahmah nong uhhi.
· China gam nitumnalam minamkim teenna Xinjiang state
sung Urumqi khuapi sung paakhuan khat ah May 22 ni in migilo pawlkhat in Mawtaw
nihtawh mihonpi lak ah bomb puaksak uh ahihman in mi 31 si in 90 liam uhhi.
· China gam leh Vietnam gam te kituhna tuipi tung ah
China te in meitui tawh akipatna hang in thu kabawlding uhhi ci in Vietnam Prime
Minister Nguyen Tan Dung in May 22 ni taangkokhia hi. Tua ban ah lampi tuamtuam
zang in nasia tak kado ding uh ci in taangko beh laai hi.
· Nigeria gam pansan Al-Qaeda tawh kizom Boko Haram
migilo pawl in sangnaupang numeino 200 vaal aguuk mang zawh uh kaal 5 acinni
May 22 ni in UN security council in naakpi tak hih Boko Haram pawlte gaakding
in khensat uhhi. Tua ban ah hi sangnau pang te zongding in USA te in gaalsiam
mi 80 Czech gam ah May 22 ni in kuankhia sakta uhhi.
· North Korea gam te in South Korea tawh gamgi
Yeonpyeong tuikulh kiang ah South Korea gaal tembaw kileh kimlaai May 22 ni in
akhalo deuhding in kap uhhi. May 20 ni in south Korea tenzong thumvei ongkaap
uh ahihman akithuk hi ci in North Korea ten gankhia uhhi.
· Ukraine gam nisuahna lam Volnovakha khuakiang a om
Ukraine gaalkaap phualpi apawlmin kitheilo thautawi pawl in galvan kicing tak
leh Thau lian thau neu tawh May 22 ni in nasiatak in do uh ahihman in Ukraine
gaalkaap 14 si uhhi. Ukraine kiteelding tawh zong kinaai mahmah ahihman Russia
te ummawh uha, Tuaban ah Russia ten hih kiteelna nawngkaai sakding hi cih
ummawh uh ahihman in UN ah thukhin kikupna bawlding in Interm Prime Minister
Arseny Yatseniuk in thukin ngetna May 22 ni in bawl hi.
· Syria gam tualgaal pianzawh kum 3 sung ah mipi 160,000
thatlum in 9.5 million gampan ahawlkhia kumpi te naakpi tak in thubawlding
French kumpi te in UN ah May 22 ni in thu sung uha, gam 60 vaal in thukimpih himah leh Russia leh China ten Veto
thuneihna zang in kakhaktan ding uh ci in genkhia uhhi.
· Afghanistan gam Kabul khuapi sung a om India palaai
zumpi May 22 ni in amikitheilo thautawi pawlkhat in sim uha, kaapgawp uh himah
leh aliam abaai omsamlo uhhi. Kua te khutman cih Kansan laaitak uha, India
kiteel mantawh kituak ahihman akahthak kumpi te adeihlo pawl hiding in ummawh
uhhi.
Lungdam
ei
Thang
Khawm Pau Zomi
