Wednesday, May 21, 2014

Tulaai Leitung Thuthang Tuamtuam Updates May 20, 2014

Tulaai Leitung Thuthang Tuamtuam Updates May 20, 2014


·      Leitungbup Huam Zomi te kipawlna khat ahi GZA President Rev Dr Simon Pau Khan En@Sia En no ait mahmah a angkawi ahi Sianu Zen Khaw Don in May 20, 2014 ni Kawlgam Nai nitaak na 5 pawl in  Asia Royal Hospital Yangon khuapi pan Topa anglum ah ongciahsan hi. Adah akap kheempeuh Topan ongheh neem ta henla, idiak in imakaaipi Dr En No Topan onghehnep sakta hen!


·      Kawlgam Census 2014 tawh kisai sum le paai athu ala kheempeuh ahuh ahi UNFPA leh EBO vaaihawmna tawh Kawlgam sung a om Minam Lian teng thukikupna May 20, 2014 ni in Yangon khuapi ah kinei a, Chin State bup taang in ZCD pan imakaaipi Pu Cin Sian Thang leh Pu Pau Lunte vakah uhhi. 914-Zomi alung muan huaizia leh August kha sung minam-mimal phazah ongtaangko ding uha, Zomi vaai ah buaina bangmah omlo in kumpi ten ongtheipih hita ahihi cihthu ongpuak uhhi. I tate ahi Chin te leh anengneng te zong lungkham lua a ong sihbup loh nading in panpih ciat ni ei

·      Nigeria gam I khuapi khat ahi Jos khuapi sung ah May 20, 2014 ni in Boko Haram migilo te in Bomb nih nasia tak in puakkham sak uh ahihman in mi 40 vaal si in tampi liam uhhi. Nungkha sung in numeino 200 vaal gumang uha, zanni in Kano khuapi ah Bomb puaksak uhhi. US leh Leitung gamlian tampi tak in hihte doding in kipan uh himah leh koilam teng haizon uhiam kuamah munailo uhhi.

·      Russia gam I khuapi Moscow khuapi pan tai 35 na ah  Vanpua Meileengpi khat in mituanna meileengpi khat May 20, 2014 ni in phukha a, mi 6 sipah in 45 liamna tawh zato tungpah uhhi. Hih aliam mi 45 te lak ah numei 25 kihel uhhi.

·      Syria gam saklam aom Marea khuapi sung Syria gaalkaap te in May 20, 2014 ni in Missile tawh naakpi tak in do uh ahihman in mi 13 si in 100 vaal nasiatak in liam uhhi. Hih asi mi 13 te lak ah naupang khuathei nailo mi 8 kihel cizen hi.

·      Mipi te daainuam mahmah lo uh ahihman in Thailand gaalkaap te in May 19 ni Martial Law taangkokhia uha, May 20, 2014 Bangkok khuapi sung  leh lungphona anei mipi te omna teng ah thautawh pai didi lel uhhi. Mipi ten ahihleh Gaalkaap te politics ah kihel kullo ci in awng ngeingai uhhi. Thailand Donghu Prime Minister pan bel daaitak in gaalkaap te onggamta un ci in thuum ngeetnguut hi. Ni Win Martial Law tawh bel kibat tuak sam kei ei

·      Singapore gamte neihsa ahi SilkAir kici Khualzin Vanleeng company te Singapore-Mandalay tangtak leensuak tading a June 20 ni in amasa peen leen kipan tading ci in SilkAir makaai khat ahi Lim Wei Peng in genkhia hi. SilkAir peen Singapore gam ah akithei pawl ci in kigen hi.

·      Kawlgam Pidaungsuh Hlutdaw pan a kiseh ahi mi 31 kihel 2008 kawlgam thukhun encikpawl in 2008 thukhun sung ah akihtaakhuai mahmah te lak ah khat ahi no.436 puahphat ding in May 20, 2014 ni in thukimna nei uha, Hlutdaw ah puakto in khensatna lading ci in genkhia uhi.


Lungdam ei

Thang Khawm Pau Zomi