Tulaai Leitung Thuthang
Tuamtuam Updates March 25, 2014
·
Kawlgam sung kumpi naseemte khasum 2014-2015
kumsung Ks 20,000 ta khanding in March 25, 2014 ni in Kawlgam Upper parliament ah thukimna
nei uhhi. Gaalkaap uk sung 1988-2010 sung in Kumpi nasemte kha sum 5 vei khang
ngei a vanman khan in khuh sukpahpah ahihman in bangmah aphattuamna omlo
hi.
·
Ongtungding March 29 niciang Kawlgam ading UN
Palaai Vijay Nambiar Kachin minam gaalkaap KIO/A makaaipi tetawh KIA phualpi
Laiza khuapi ah kimukhawm in Kawlgam
kilemnading tawh kisai nasiatak in
kikumding hi ci in KIO te in March 25, 2014 ni in taangkokhia uhhi.
·
Malaysia gam a mang Van leengtawh kisai in
Malaysia kumpi pa in India Tuipi sung ah kia a mite khatzong nungta nawnlo hi
ci in March 24,2014 ni in taangkokhia hi. Ahizong in Avan leeng akimu cihbang
hinailo a US,UK,Australia,China,Malaysia leh French te in nehtak in azon
laaitak uh ahihi. Hih vanleeng zonna ah makaai ahi Australia te in khuahun
sialua mahmah ahihman in nai 24 kikhawl photding hi ci in March 24,2014 ni in
taangkokhia uhhi. Malaysia kumpi in hibang in ataangkotheihna kuakiang pan
kipsakna ngahhiam ci in China kumpite in Malaysia kumpi tea dot laaitak hi a,
China gam Malaysia Palaai zumpi maai ah Vanleengtung atuangte sanggam te in lungsosa
in sim uh ahihman in Palikte tawh nasiatak in buai uhhi. Australia tenbel
asawtlo in vanleeng kitaktak hi ci in uptheihnading avanthem konglakding uh ci
in kamciam pia uhhi. Hihbang a upmawhna ongpian theinading in Australia,
China,French leh UK te in hih India tuipi sung ah vantuamtuam khuaphelep
manzaihna tawh mukhia uhhi. Malaysia Airline ten bel misite luangmanding mikhat
$5,000 ta piakding in gaaltoto ta uhhi.
·
US gam Washington state sung ah Saturday ni
mencipna hang in misi 6 March 24,2014 ni in kimuhbeh a tun misivekpi 14 cingta
hi. Kumpi tetung a mi amangthang laai sazian kipiapeen 108 hi a akimulo
tammahmah laai ban ah Mencipbeh theikhading ahihman in thungetsakciat ni ci in
President Obama tawh March 25, 2014 ni in eite kheempeuh kongzawn uhhi.
·
US gam Virginia state aom US Tuigaalkaap phualpi ah march 24,2014
zan in thautawi pasal khat in Tembaw
hawlpa khat kaplum ahihman in Tembaw cing gaalkaap ten umcih kaplum kik uhhi.
·
Thailand gam khunglam Kawlgam tawh gamgi Tak
Province sung ah March 25, 2014 ni in Bus pi khat lamto akah laaitak kibung
ahihman in mi 30 si in 22 liam uhhi ci in Thailand kumpi thuneite in
taangkokhia uhhi.
·
Afghanistan gam ah ongtungding April ni 5 niciang gambup kiteelpi na neiding uh
ahihman un Taliban migilo te in hihkiteelna kanawngkaai sak mahmah ding uhhi ci
in ataangko kawmkawm un March 25, 2014
ni in Kabul khuapi sung a Election zumpi sim ek uh ahihman in palik pawlkhat
leh mipi pawlkhat si uhhi.
·
Taiwan gam leh China gam te sumzon sumzuakna ah
kizopding deihlo a lungphona anei Sangnau pangte leh kumpi thunei te hih
lungphona adiahtheih nading in thukimna khat March 25, 2014 ni in ngahta uhhi.
Tua thukimna in ahih leh Sangnau pangte leh
President Ma Ying-Jeou kimukhawmding cih ahihi.
Lungdam
ei Laai ongsimsak teng tung ah
Thang
Khawm Pau Zomi
