Tulaai Leitung Thuthang
Tuamtuam Updates March 25, 2014
· 914-Zomi ah kigawmding ci in Zomi kheempeuh kithu kim
I omlaaitak in laai kigelh magazine tuamtuam zongkawikawi in alangpangnuam
mipawlkhat in amau deihbang in 914 ah minam min manlo agelhsimte thukhuntawh
kituak bang in mawhmatna kipiading cihthu Zomi te thuakding bang in genmawkmawk
uhhi. Hih thuthang tawh kisai in kawlgam sung a kumpi deihvetlo gammi ahilo
Rohingya te adaalna , agenna hi a, gammi ahi Zomi tawh kisailo ahihman in
lunghihmawh nading bangmah omlo hi. Zomi peen Kawl kumpi te in ommah hi
ongcihkhit ban ah kiptak a ngeina,laai, mun le mual anei ban ah mimal aom
ngiat., Political party , Social organization kiptak aneite ihihi. Alau huai
zaw ah 914 ah akigawmlo Zomi te angeina, amimal, Laai te kisit kikding a.,
mimal cinglo leh Zomi tawh ngeina laai akibangteng Zomi ah onggawmlel ding
ahihi. 914 peen Kawlgam mi ahi Code number angah naailo te leh minamkee 135
sung akihello, Minam minthak adeihte ahi ci in Immigration Vuanzi U Khin Yee in
genkhin ta hi. Tua ahihman in 914 ah Zomi te kisaunna, launa omlo a
khumziahziah ding ahihi. 914 ah akhumte gammi hiloding, gimna kipiading ., ci a
mawk ciakciak, tengpeen Kumpi lamtawh
zong akimukha ngeilo Laaitheilo inn phualzaang a mawk otot mawkpaupau teng ahihi. Zomi makaai ten Kumpi
thunei te tawh hoihtak kimu a ageel ahihman in 914-Zomi ah khumding sang
amanzaw omlo hi.
· Yangon khuapi Bangladesh Palaai zum maai ah March 26,
2014 ni in mipi 2,000 vaal in Bangladesh gam Dhaka Tribune thuhtang tung a
kigelh Rakhaing gam a Kalate tenna teng Kawlgam pan taaikhia in Bangladesh tawh
kigawmding cih thuthang deihlo in lungphona nasiatak in nei uhhi. Hih thu hang
in Kawlgam kumpi te in Bangladesh thuneite sam in nialkhin uhhi.
· Kawlgam sung aom Rohingya minamte kawlgam sung ah
gammi suaksak a, minamkee khat a ciapteh ding American Parliament dawl nuainung
ah March 26, 2014 ni in nasiatak kikum uha, Kawlgam kumpi tung ah zong ngetna
nei uhhi.
· Mague Division, Pakuhku khuapi ah 2008 kawlgam thukhunpi kheelding tawh kisai
mipitung ah taangkona anei 8888 makaai 4 te Palik te in March 26, 2014 ni in
thukhun number 18 tawh man uha, Bond tawh suakta uhhi ci in 8888 makaaite in
taangkokhia uhhi.
· Kawlgam President U Thein Sein in kumpi sep kum 3
cinna phawkna in Pituh Hlutdaw ah March 26, 2014 ni in thugenna nei a ,
agualzawh sunsun te leh anaseppih te pahtawina tamgen hi. Pu Thein Sein in
kumpi asep kum 3 sung anihveina Pihtuh Hlutdaw ah athugenna zong ahihi.
· Kawlgam sung apiang Singkung te Tuma kum 15 sung akizuakman
$20 billion vaalpha a kumpi te in 28% bek sazian nei in 72% golhguuk in bei hi
ci in EIA te in March 26, 2014 ni in taangkokhia uhhi.
· Malaysia gam a mang vanleeng hiding a upmawh Van 122
Khuaphelep manzaihna pan March 26, 2014 ni in kimuthak a atel
etdingin.,Australia,Newzealand,Malaysia,China,Japan,USA,UK,French te tembaw
tawh kipei ziahziah uhhi ci in Malaysia Khualzinlam Minister pa in genkhia hi.
Hih vanleeng mangtawh kisai atelkan ding in China gamte in Malaysia gam ah
mimuan khat paisak uhhi.
· Netherland gam The Hague khuapi ah Leitung Bup Nuclear
khawmpi March 25 ni in kibawl a, gam 39 te in Nuclear daalna gamthukhun ah
koihding in thukim uhhi. HIh khawmpi mankhit ciang Leitung Gamkhangto G8 (gam8)
pan makaaite Netherland gam the Hague
khuapi mah ah March 26,2014 ni in khawmpi nei uha, G8 pan Russia
tuatkhiat ding in kithukim uhhi. Russia ten bel ongheem dah le uh hoihzaw hiven
ahizong inghep teitei uhleh zong Russia gam ading in laainatna omkhol kei
cihsan uhhi.
· Netherland gam The Hague khuapi ah USA, Japan leh
South Korea gamthum te amasa peen kimuhkhopna March 26, 2014 ni in nei uhhi.
Hih kimuh khopna ah adiak in North Korea tawh kisai kikum uhhi.
· Netherland gam the Hague khuapi ah Meeting tuamtuam
kah a apai President Obama acing Ulian khat nitaak damdawn zek hiding hiven
President pa azuih langlang laaitak in tukmawk a, akisit leh Zu nakham laai
ahihman thumanglo mawhna tawh March 26, 2014 ni in kiciahsak hi ci in
Washington Post in gelh hi. President Obama tukaal sung mah in Rome khuapi
paiding a Pope Francis tawh kimuding hi cin Innkangpi in taangkokhia hi.
· North Korea gamte in tai 400 ciang atuthei Thaupi nih
March 26, 2014 ni in lawmkhia uha, Japan leh South Korea kikaal tuipi tung hi.
US-South Korea gaaldo kisinkhawm sung., Netherland gam Japan-Skorea-USA North
Korea vaai kikup laaitak ahihman in Gaalkidoding in ongphin hi a kimawk
koihloding ci in South Korea leh USA te in thakhat thumah in taangkokhia pah
uhhi.
· 2001 kum USA gam ado 911 buaina ah akihel Bin Laden
tupa Sulaiman Abu Ghaith migolo ahihna kimu ahihman in New york khuapi pan
gimpiakding in March 26, 2014 ni in thu kikhen hi. Amah peen 2013 kum in Jordan
gampan kiman hi a US gam ongkipuak ahihi.
· Israel leh Palestinian kikaal kilemna aomtheihnading
vaihawmding in US Secretary of State Mr John Kerry Rome khuapi pan Jordan gam I khuapi Amman lamzuan in March
26, 2014 nii n leeng a, Palestinian President Mahmoud Abbas tawh March 27
akimuh khop khitciang Israel Prime Minister Benjamin Netanyahu tawh teleconference
neiding uhhi. Israel ten Palestinian thongtaang a 4 vei khahding kiciamna ni 5
bek in samlai himah leh Israel te paunaailo uhhi. Thongtaang akhahkhiatkhit
mateng uh kiholoding cih Palestinian te vauna ahihi.
·
China President
Xi Jinping Piantit gam Paris khuapi ah
ngaihhawh ding in March 25,2014 ni in tungta
Piantit kumpi te in thupi tak in namuak ziahziah in Vaaitun Zozu khum mahmah leh Sangoi tawh
zin nado uhhi. March 26, 2014 ni in gamnih sumzon paaizon kizopna thukimna
pawlkhat bawltheiding in kilam en hi.
Tam
laai lua Nasep kuanhun hizah cipak ni ei
Thang
Khawm Pau Zomi ( Lungdam )
