Tuesday, November 19, 2013

Tulaai Leitung Thuthang tuamtuam updates November18, 2013




Tulaai Leitung Thuthang tuamtuam updates November18, 2013


·       Zogam sung apuah ngiatngiat ahi ZRDP Director Pu H Vum Za Nang 11/17/13 ni in ka omna  Bowling  Green,Kentucky onghawh dihdih a, kum 5 khitciang kakimuh kikna uh himawk ahihman in gending tam kisa in kakituh ziahziah uhhi. Kokiang ong omsung kakiho nate uh hawmthawh kahihman un kokiang pan nai khat paina Nashville khuapi dong ka khasuk  hi. Thu tampi Zogam,Zomi tawh kisai kakikum kha uha, Tuate sungpan Pu Vum Nang thugen dik kasak mahmah khat Zogam ah Pasian thugen kitam mahmah in Pasian naseem kitawm ci hi.

·       Pasian thu kigengen a ahizong in Zogam sung a Zomi te hamsatna thuakna peen ahi ann duh gilkialna khualzin gamvaak hamsatna ahuh, adon, lampi azonsak  tawm mahmah ci hi. Man kasa mahmah hi. Zogam ah Crusade kibawlbawl in kilawhcing mahmah hi. Ahizong in crusade bawl Sia te aciah khitciang Zing Ann huanding kineilo pah phangphang a vaanpan ongkia lo  hi. Ngah sut huai kasa mahmah hi.

·       Tuakhit ciang Pau aw Zogam ah Security kisam vahang aw ongcih kawmkawm in, Zogam ah ken Ka leito set in Leiphulding a ken ami naphulding hing ongcih khitteh, Kazi in Zogam ah Mawtaw lampi tonuamlo in ken tonuam kahihteh ngimdan kibang lo ahihman in kaki aakgualkhen uh ahihhang tun Mawtaw lam tonuam khat omtuak nuikawm in ongci hi. Ipan pih zawhzah in Zomi akua mapeuh in panpih tek in thungetna ah phawk  nei ei. Pu Vum Nang Topan cidamna mazanna ongpiaksak ta hen.

·       Kawlgam kumpi in kilemna kilemna langkhat ah acihcih kawm in Mualtungmi thautawi KIA te leh Kawlgaalkaap te 11/16/13 ni pan 11/18/13 ni zingsangdong Mansi township sung ah kikaap ngeekngeek uh ahihman in mipi 2,000 vaal gaaltaai uhhi. Yangon khuapi a omlaaitak Bu Guam Maw in kidonapeen tuzing dong mah kikap ciatciat laai mah ci in 11/18/13 ni in genkhia hi.

·       Kawlgambup kilemna dingtawh kisai in November 25 ni Thailand gam Chinmai khua ah Mualtung thautawi kipawlna UNFC leh Party tuamtuam te in thukikupna neiding uh a, Tuakhit ciang December kha beima  in kilemna dinga thukikupding ahaampi kumpi tung kipuakding hi ci in KIA Bu Guam Maw in Yangon khuapi Business Alliance Hotel ah 11/18/13 ni in thukan tetung ah gencianna nei hi. Hih Nov 25 Thailand gam a kimuh khopna ah ZCD panzong makaaite vapaiding uhhi.

·       Nypidaw Myanmar convention Center ah 11/18/13 ni in Kawlgam sung Singtaang gamte khantohnading tawh kisai khawmpi khat kibawl a Kawlgam President U Thein Sein in thugenna nei hi. Ka kumpi hun neihlaaisung in hih singtaang gam khahtohnading tawh kisai in gualzotak in sepding geelna kanei hi ci in genkhia hi.

·       2012-2013 sumzeek kum ading in Kawlgam sum le paai zonna lam khantohnading, minam kipawlnalam khantohnading, kilemna akhan seemseem nading in EU sum AWN 150 kapia khia khinta uh hi ci in EU kipawlna te in 11/18/13 ni in taangkokhia uhhi.

·       Kawlgam sung a minam kee ahi Kachin,Kaya,Karen ,Mon leh Shan minamte sung ah Kumpi dona hang in cimawh a gaaltaai te panpih nading in $ AWN 25 kapiakhia ding uhhi ci in USA te in 11/18/13 ni in taangkokhia uhhi.

·       Russia gamte neihsa khualzinmi apau Vanleeng Boeing 737 Moscow khuapi pan tai 448 na Kazan vanleeng tual ah 11/17/13 ni in puakkham in khualzin 44 leh vanleeng naseem mi 6 akigawm  mi 50 si hi.  Hih vanleeng peen Moscow khuapi pan ongleeng hi a Kazan vanleengtual atuding tupaktheilo in nihvei atuksawmna pan lamdaalna phukha in apuakkham ahihi.

·       Philippine gam huihpi nawk ni 10 acinni 11/18/13 ni n tui lu tuitaw a om micimawh te USA te gaalvaanleng tual ahi  USS George Washington tung ngawngaw ta ahihman in hih Tembawpi tungpan gaalvaanleeng tetawh amunmun ah huh khiat kipan ziahziah ta uh ahihman in mipi lungdam mahmah uhhi.

·       EU gam Italy tuikulh khat ahi Sardinia tuikulh  11/18/13  ni in Cyclone huihpi leh tuihualpi  in nawkgawp a mi tampi tak in inn le lo nusia in ataaikeek ban ah atawmpeen misi 9 kimuta hi ci in Italy gam Rai TV in genkhia hi.

·       Leitung a vanlam khualzinna minthang mahmahkhat ahi NASA te in Mars leitung  ah zawl leengding in Vankhual zinna khat 11/18/13 ni  suun 1:28 in Florida's Cape Canaveral Air Force Station pan khahkhia  uhhi. Hih Mars leitung a zawlleengding vankahna peen kha 10 sung kaaiding a September 22,2014 kiimpawl ah tungding hi ci in NASA te in genkhia  uhhi.

·       Argentine President Cristina Fernandez de Kirchner akhuak ki-at napan damsianta in 11/18/13 ni in nasep kipanta hi ci in President zumte in taangkokhia uhhi. Amah  peen October 8,2013 ni a akhuaksung ah sikhal ahihman in ki at in zato lum ahihi. Ama ading a thungetsak ahuh apanpih kheempeuh tung lungdamkohna Video zong khahkhia hi.

·       Italy palik te in Mafia migilo pawlpimi mi 45 Italy gam Brindisi khuapi kiang ah 11/18/13 ni in man uha, Mithat,Buluh leh vankham seem cihte tawh mawhmat uhhi.

·       Iran te in Drone kici ahawlpalo tuithe vaanleeng gol mahmah khat bawlkhia ta uh a aminding in Fotros phuak uhhi ci in Iran Defense Minister  Hossein Dehghan in 11/18/13 ni in taangkokhia  hi. Hih ahawlpa lo Fotros in tai 1,200 sung veengzo ding ahihman in Middle East sung teng Israel nangawn a utut in nuai thei hi ci in Hossein Dehghan in genbeh hi.

·       Syria gam Tapong gaalkaap mangpi Abdul Qadir al-Saleh 11/15/13 ni a Syria gaalkaap teng vanleeng tawh adona hang in liam a 11/18/13 ni in si hi ci in Syria tapong te in genkhia uhhi. Abdul Qadir al-Saleh peen  Aleppo province sung ah tapong gaalkaap maangpi hi a gaalkaap 8,000-10,000 kikaal nei ci hi.

·       Leitung ah gamtha haatpeen gam 6 ahi P5+1 kici Britain,US,French,China,Germany leh Russia gamte in kum 10 sungbang maainawtlo nungkinlo a aom Iran gamte I Nuclear vaai 11/20/13 ni in Geneva khuapi ah kikupkhona neiding uhhi. Russia President Vladimir  Putin in 11/18/13 ni in  hih P5+1 te thukikupding vaai Iran President Hassan Rouhani phone kaset leh athu hoih tuak ci in genkhia a, ahizong in Iran President Hassan Rouhani in hih ko Iran te I Nuclear vaai no P5+1 or Western Power te in ong zawhthawh kei un ci in Iran official website ah vauna gelh giap hi.



Laai mal&ani akha kikhial kha aom leh ngaihdam bawm ah ong na khiatsak un maw


Thang Khawm Pau Zomi