Tulaai Leitung Thuthang
tuamtuam updates October 7, 2013
·
Kachin
minam thautawi KIO te leh Kawlgam kumpi kilemna bawlpawl 10/08/13 ni kilemna
thukikumding in 10/07/13 ni in Mitkyina khuapi tung ziahziah ta uhhi. Kawlkumpi
lampan Vuanzi U Aung Min makaai mi 5 pai
uh a Gaalkaap Duh BumuKyi Myint Soe kihel hi. KIO lam pan Pu Suan Luat Gam makaai in Duh Sit U
Si choh Bu Guam Maw zong kihel hi. Hih kimuh khopna peen maailam kaalsuanna
ding khempeuh ading in thupi mahmah hi
ci in Bu Guam Maw in genkhia hi.
·
Thailand
leh Kawlgam gamgikhua Ranawng khua gunpang ah ngabeng a akhawl Kawlgammi te
setli khat agas puakkham ahihman in tangvaalno kum 25 khat si pah in mi 5 liam
uhhi ci in Thailang mihonpawl in 10/07/13 ni in gen uhhi. Hih meikaang a aliam
mi 5 te Ranawng khuasung a om zato ah kipuakphot hi ci in genbeh uhhi.
·
Rakhaing
minam te neih Party ahi ALD (1990) leh RNDP (2010) te geel kigawmkhawm in 2015
ah kiteelna demding in thukimna 10/07/13 ni in neikhinta uh a Party thak
mindingin Arakan National Party ( ANP)
kikipsak in Kumpi tung ah phalna angetlaaitak hi ci in ALD makaai U Aye Tha Aung in genkhia hi.
·
USA
gamte in Sumtuh akibawl theihlohnading ngimnatawh 10/08/13 ni pan zattheihding
in US Dollar 100 laai athak liklek bawlkhia khinta uhhi. Amaai lam ah Benjamin
Franklin lim tuangding a anunglam ah Philadephia aom Suahtaakna Innpi lim
kituangsak ding hi. Alui tawh kilamdang
lo napi in atuh aomtheiloding in apiandang deuh a abawlkik uh ci hi.
·
2013
Zatui pilna lamtawh Nobel minphatna
ngahding in USA gami James Rothman,
Randy Schekman tegel leh German gammi
khat ahi Thomas Sudhof te kiteelkhia hi ci in Sweden gam Stokcholm khuapi Nobel ngahding kiteelnapan
10/07/13 ni in taangkokhia ta uhhi. Amau
teng thum peen USA gamsung Universities te ah zatui tuamtuam zongkhia te a hi
uhhi.
·
USA
gam kumpi nasepna pawlkhat adinkhawlna ahaang ahi sum le paai vaaitawh kisai in
Republican te deihna peen ka kuppih kilkel keiding ci in President Obama in 10/07/13 ni in genkhia
hi. Party hai a hailo a Hlutdaw ah thudam a kikupding hi ci in Obama in
Republican te zolzol hi. Ahizong in Hlutdaw dawlnuai nung Makaaipi Republican party John Boehner inbel USA kumpi nasepna leh
sumvaai atawknawi Republican te hilo in President Obama hi cihsan in
thukikupding nialsan hi. USA gam I kumpi nasepna pawlkhat adinkhawl zawh tun
akaal nihna sung ah aluutta hi a
bangmahkilamdan na omlo ban ah honkikdinglam agimzong namnaaivetlo hi.
·
Italy
gam Lampedusa island kiang ah 10/04/13 ni a gaaltaai mi 500 apua tembaw kibung
tawhkisai in misi 232 kimukhinta a mi 200 kiim mangthang laai in tembaw zong
tuipi sung ah tumlaai hi ci in Italy Navy te in 10/07/13 ni in
taangkokhia uhhi. Hih gaaltaai mite peen Somalia gam leh Eritrea gampan ahi
uhhi.
·
Brazil
gam Rio de Janeiro leh Sao Paulo khuapi
sung te ah 10/06/13 nipan Saangsia 10,000 in khasum khanding ngen in daaitak in
lungphona aneihna uh pan 10/07/13 niin gamlum deuhdeuh in lungphona aneite in
meipuakte tawh innte deng uh ahihman in palikten khitui luangsak bomb tetawh
deng in nasiatak in buaina khangsemsem hi.
·
Argentine
President Nu Cristina Fernandez kum 60, asiavuan te in khakhat nasep
tawlngading in 10/06/13 ni in thu apiakkhitciang in akhuaksung ah si om ahihman
in 10/08/13 ni in ki-at dinghi ci in asiavuan te in 10/07/13 ni in taangkokhia
leuleu uhhi.
·
US
Commando pawl in Al-Qaeda makaaipi khat ahi Anas al-Liby 10/05/13 ni in Libya gam khuapi Tripoli ah ahingmatna hang un lungkimlo in Somali gam
akiphualsa Al-Qaeda makaaipi al-Shabab
in US commando te anuaikikding in gaalkaap 200 leh machine gun tampitak
puakhia hi ci in Barawe khuami te in
genkhia uhhi.
·
China
gam nisuahna lampang teng 10/07/13 ni zingsanglam in Typhoon kici huihpi leh
guahpi in nasiatak in nawk in mi 5 si a mi 4 mangthang hi ci in Xianghua
thukizaakna in genkhia hi. Tua bekthamlo in inn le lo mawtaw te akipan vantampi
sia a khuasung teng tui in tumzihziah hi
ci hi.
·
Sephardic
Jewish community te makaaipi Rabbi
Ovadia Yosef kum 93 teeknatna tawh 10/07/13 ni in si a Misi zui a theihsa Jerusalem khuapi sung ah 700,000 phazen ahihman in Palikten mipi
nasiatak in adaalkawmkaal kiphuutna hang in mi 40 liam veve laai hi ci in
cinapua team te in genkhia uhhi.
*thusuak peen nisim hunngahlo tawh group kim ah
ongsuaksakzolo kahihman in Zomidaily leh
http://buanli.blogspot.com ah nisim kisimthei dending hi*
Thuumna: Laaimal kikhialkha leh laaimal kilawmlo, ani ache
akituaklo kha akipan kisapna tuamtuam aomkhaak aleh ngaihdambawm ah nongnakhiat
sak un maw
Zomipau
