Saturday, October 26, 2013

Tulaai Leitung Thuthang tuamtuam updates October 25, 2013




Tulaai Leitung Thuthang tuamtuam updates October 25, 2013



Mikaang (English) tetawh na nasepkhopciang

·       Married Zi/Pasal neikhin nahihna akilatnading in Married Ring bulh hamtang inla naneih  kei leh zong Married Zi/Pasal neikhin hing cih theisak hamtang in. Tua bang in Married Zi/Pasal nei laaitak nahihlam ongtheih naak uhleh Vaupaak nabang a, Unok paak nabang lialua zong in zawlthu onggen loding uhhi.

·       Na nasep amasa peenpeen ni in nangapzah vaal nahaatna zahvaal in nasep hanciamluase kei inla nanasep zawhsawmlel in. Amasa ni nahahkat luatleh anidangciang amasa ni zah in nahaatkei leh thadah,mizuau ongciding uhhi.


·       Nang sepding a kikoih ciang sepzawh sawm lel inla, Huhna ongnget kei naak aleh huh mawkmawk sekei in a hawmthawh sa in onghapgiap theiding uhhi. Na huh nop leh zong konghuhtheidia (Do you need Help or May I help you) cimasa tangtang in.

·       Na kimaai ngap mahmahkhit masiah, aci asa ahihkeh apuan nawkkha lawngkha kei in. Ngalkhaatpi bang in dianggawp in heh bambam thei uhhi.


·       Ong kimawlpih uhhaang kimawl a utlo bang in omhithiat zaw inla kimawlpih kei in, A utut un ongkimawlpih ding uh a alungtom hunkhat tawh kituak in namawlpih hunciang makaaite tung ahihkeh Zum ah ongkhia ding uha, Nang nalel ding hi.

·       Maitai tawntung inla ciamnuih akigen keinaak leh mawknuih haihai sekei in. Akician phalo in ongngaihsun ding uh a sawlsuk sawltoh nangahding hi.

·       Na makaaite Ong sawlbang zawhsawm inla, adangte ongsawl kheempeuh A-na in mawk man haihai kei in. Mikaangten A-na  neilo uhhi.

·       Ciah leh Kuan hun man mahmah sawm tawntung in. Ze kaai khapak cihbang Mikaangten zangngeilo uhhi.

Naseem Interview napai ciang

·       Amai ngal mahmah bang in om inla,  Ki innteeksak in napau theih sunsun suakta tak leh maan tak in pau hithiat in. Suaktatak in tu il ial inla, Khut zep thengthang sekei in.  Adamlo ongsa in zato napai phot in ongcikhading uhhi. Apau natel lohte aw aw he he cikei inla Nuvui-Dahsiing; napau telpak keng hehpihnatawh adang kammal khat tawh nonggeenkik theidia (I am Sorry; I do not understand what you tell me. Can you please use another word) ci mingmeng lel in.

·       Nuih zaak nading thu onggen ahihkei naakleh nui thutthut sekenla ong interview pa en gige lel in. Nakiim napaam ah nalawm nagual leh natheihngei mi aom phialzong in athei ngeilo bang in ensekenla thu  ongdongpa en gige lel  in. Ei Zomi te daan in anuinuite Mikaang ten abiangze cilo in ongthupi simlo ci uh ahihman lau huai hi.

·       A haat mahmah, acidam mahmah,Abel  mahmah, Nisim nasep pelh ngeilo, Hun man mahmah lawm le gual tawh akithuah siam, Makaaite thu anial ngeilo, Kilemlohpih anei ngeilo bang in tangtak in kigen geugeu inla, Nuikawm khuadaak kawm het kei in.

·       Ong kidong thute tangtak in dawng geugeu inla heemgeen, kamsiam cihte zangh khakei in. Zawl thugen hilo nahihlam mangngilh kei in.

·       Kampheen zang a Interview nahihleh nakampheenpa kampau nabil tawh ngai inla, nang thu ongdong pa engige zaw in. Dotnop kupnop naneih leh  nakampheenpa dongkei inla nang thu ongdongpa dong in, nakampheen pa in kam ongpheensak ding hi.  Kamphenpa tung dotnop naneihte apualam ah dam in dongzaw in.



Thuthang  

·       Kawlgam Speaker of the lower House Tura U Swe Mann 2015 kawlgambup kiteelna ah President tuhsawm ahihman in mipi muanna ngahtheihnading geelnatawh Chin state sung ah maaipha zongding in 10/25/13 ni in Hakha khuapi tungta hi.

·       Japan gam Tokyo khuapi ah December 17,2013 ni a kibawlding Miss International 2013 ah avademding Miss Gonyi Aye Kyaw in apuansilh ding in Kachin minate ngeina puanteelkhia citciat  se hi. Ahang akidotciang  Kachin leh Kawl minamte sitkhat sakhat bang ki-it ki-om cih kadeihna hi ci hi.

·       October kha 22 ni KIO leh Kawl gaalkaap te kikaapna hang in lau a gaaltaai khuasung mi 1,200 ten hamsatna lianpi tuak uha, Tuate huhtheihnading lampi kawl kumpi te in hongsak a ahuhtheih nading un Kawlgam UN Palaai Ashok Nigam in 10/25/13 ni in taangkokhia hi ci in UN Secretary zumpi pan Martin Nesirky in genkhia hi.

·       Britain gam azin Kawlgam Democracy makaaipi leh NLD Lutangpi Daw Aung San Suu Kyi 10/25/13 ni in Sandhurst Gaalkaap University pi ah thukankual in vahawh a, Gaalkaap BU sin sangnaupang te maai ah thugenna vanei hi. Daw Suu hibang a Britain Gaalkaap Saangpi ah onghawh a thugen ongneih kalung uh dam ngaungau mai ci in Britain Defend Minister Philip Hammond in genkhia hi.


·       US gam NSA ( National Security Agency ) te in Germany, French leh adang EU gamlian pawlkhat te I Uliante phone kihona aw akhumsimna hang un adiak in French leh Germany te hagawi giapgiap in hehmahmah uh ahihman un, US ah Thukan maangkhat  paisak in kihoding ci in Germany ten 10/25/13 ni in taangkokhia uhhi. ( Khanglui te pau naak khat mui zanglua kipeisat acih peuh battuak saang US te )

·       Brazil gam khuapi  Sao Paulo khuapi sung a om Bus khawlna phualpi ah 10/25/13 ni in Bus man tamluatna pan amawkna a tuantheih nading ngeen in mipi te in Buluh uh a Bus te haal in asumte uh laksak haalsak cihbang in ngongtat gawp uhhi.

·       Nigeria gam saklam aom Boko Haram singnuaimi te kiphualna khua ahi Damaturu khua Nigeria gaalkaap te in 10/25/13 ni in nasia tak in buluh uha, Boko Haram singnuai mi a upmawh gaalkaap 74 golum uhhi ci in Nigeria gaalkaap te in taangkokhia uhhi.

·       Syria gam Damascus huam   Suq Wadi Barada khuapi sung a  om Muslim biak inn pualam ah 10/25/13 ni mipi kikhawm apusuak lianlaaitak mawtaw tung ah Bomb khauh mahmah nakisiah in puakkham ahihman mi atawmpeen 40 sihkhat in si hi ci in Syria TV pan taangkokhia uhhi.

Nasep kawmtawh buailua kahihman in  edit kabawlman kei a , Khialhna aom khaak aleh ngaihdambawm ah ongkhiat sak in naleptuah sak un.
           Thang Khawm Pau ZOMi