Tulaai Leitung Thuthang
tuamtuam updates October 16, 2013
Zomi Kheempeuh in I it mahmah ahi Khalam taksalam ah Ipa Rev
Dr Chin Do Kham luanghawm Tulsa khuapi 10/16/13 ni in tungkhinta a, 10/19/13 ni in Tulsa Khua ah
kivui tading hi. Alamdang mahmah in Pasian in atapa a it daan asangkahna leh Professor
asepnalui Oral Robert University neipa Oral Robert leh Pasian naseem miminthang
te kivuina haan ah kivuiding hi. Leitung muntuamtuam ah Zomi te in Dr Kham
Pawkna hun kibawlciat a, lungleenna itna ngaihna te kisuutsuut laai hi.
Dr Khawm Luanghawm tawh kisai in Internet sungkhawng ah
huihbek mahtawh aluanghawm kawlgam ah puakding kitaangko saamnapin asum apaai
apiakhiading leh Azi ata abeh aphungtung ah thupi tak a angeen kuamah ki omlo leh angen
sun ten kapuading uh cihlam hilozaw in ongkha un cihlam ahihman in
huihlak bek mah ah amaaimang suak a , Tulsa khuapi USA gam ah akivuiding suak
hi.
Zomi hizah ahau alian apil asiam ki om saam a imakaaipi khat
lawmlawm Innteek te igamtatsak peen khasiat huai mahmah hi. Zomi te peen minam avei ait thu le la akinteng peen aneiloteng,
ahaiteng ihi sese a, Vok bang a Tonsim lam a zuakding lah ahisam lo apil, ahau
, athau tata bangmah kinlo, ciil tentan a I om mihmiah peen iminam cidamlohna khat
ahihman khasiat huai mahmah hi. Vantung leh Hell ah sum kipua theilo ci hi.
Rev Dr Chin Do Kham zahtaakna
leh itna lahna in asihni pan mithum sung na seemlo in akhawlcip kahi a,
asi te lah ongtho kik nawnloding ahihman
Topa Khasiantho kihehneemsak in ikhitui nuulkawm in nasep kipan kik ta ni…
·
October
kha 15 ni in Madalay khuapi leh Sagaing khuapi sung ah Bomb puakkham a, October
14 ni mah in Yangon Trader Hotel sung ah
bomb puakkham leuleu ahihman in USA gami
numei khat liam hi. Hih Trader Hotel Bomb puakhamsak mi thumte 10/15/13 ni in
Mon State Bilin khua ah kiman a mithum lak ah khat pa KNU gaalkaap lui ci hi. Manlay leh Sagaing a bomb puaksak te lak ah nih
peen 10/16/13 ni in Mon state ah kiman leuleu in khat taaisuah ci in Mon state
palik te in genkhia uhhi. Hihbang a tusungteng kawlgam sung bomb puakkhapna hang
in USA gam leh Gamlian pawlkhat te in kawlgamsung zinloding in agammi te uh thu
pia uhhi. Aung San Suu Kyi inbek Lau O Vuau citeitei hi.
·
Kawlgam
Democracy makaaipi leh NLD makaaipi Daw Aung San Suu Kyi Europe gam athumveina
khualzinding in October 18 in kawlgam pan dingkhiading a November 2 nidong gam 5 zinkawikawi ding hi ci in NLD zumpi te
in taangkokhia uhhi.
·
Denmark
kumpi te huhna leh thukimna ombang in Chin State khuapi 5 te ahi
Tedim,Tonzang,Falam,Than Tlang leh Khalkha khua tan 10 saangte ah amasapeen Computer pia khinta a, anihvei na
Matupi,Kanpalet,Paletwah leh MIndat khuapi tan 10 sangte ah kipia ding hi ci in
CNF makaaiten taangkokhia uhhi. Computer
athuahsak ding peen athuahtheiteen ngeentek uha, Titsa Oo te in ngah ci hi. Denmark
gam te in Chin State bup ading Computer 903, Space pan Internet matna set 35,
Meiset leh Dynamo 30 ongpiakkhiat uh ahihi. CNF te peen kawl kumpi tetawh kilemna thukimna
abawlna uh ah Computer IT lam ah Chin state ading mapangkhawmding cih om
ahihman in amautung ongtawn hi a CNF te huhna hilo hi.
·
Philippine
gam ah 10/15/13 ni in 7.2 Magnitude ahaat zin ling ahihman in mi 150 vaal si in
300 vaal liam uhhi. Tua ban ah inn le lo tampi tak sia ahihman in mi a 10,000
asim in hamsatna lianpi thuak uhhi. 10/16/13 ni in Philippine President Benigno
Aquino in hamsatna thuakteng baan et in tha piakawikawi hi.
·
USA
gam California state Catalina tuikulh kiang ah tuisung lam naseem
Siama Jasmine Santana kicinu in 10/16/13 ni in
Ngasa-,Sanga pi 18 asau khat asisa in mu ahihman lamdang salua in
alawmte sam a tuinawl ah mi 15 in akaih khiat uh leh kaaizopan uhhi. HIh Ngasa peen Oarfish
kici in leitung ah asaupeenpeen hi ci in
genkhia uhhi.
·
USA
gam sung buaina ahi Kumpi nasepna pawlkhat adinkhawlna pan angeibang in
akihonkik theih nading in sumvaai thukhunthak khat 10/16/13 ni in Upper Parliament ah Meetang DEih 81, Deihlo 18 tawh thukimna
ngahta uhhi. Asawtlo in Lower Parliament ah Meetang tawh thukimna kila leuleu ding a
thukimna hoih akingah leh Kumpi nasepna angeibang in ongkihong kiktading hi.
Malaysia pan USA ongleeng dingte zong ongkihong kiktading hi thungetna ah phawk
ni ei
·
Laos
gamte neihsa Vaanleeng mi 49 apua ATR 72-600 khat khuahun siatluatna hang in tuhteilo in
Mekong gunsung ah 10/16/13 ni in kia a Vanleeng tung a atuang khualzin mi 44
leh vanleeng naseem mi 5 si hi ci in Loas vanlam saite in taangkokhia uhhi.
Tuaban ah hih misi te peen French, Australia, Thai leh S Korea gammite hi ci in
genbeh uhhi.
·
Paraguayan
gam
Santa Rosa de Aguaray khua ah Jose
Manuel Riella, kum 103 leh azi Martina
Lopez, kum 99 te in kum 80 sung nupa a aom khit uh 10/16/13 ni in biakna ngeina
bang in mipite maai ah Siangtho kiteena nei uhhi. Atate uh 8 leh Atute uh 50
,Atusawn te uh 55 tengzong mopawi ah kihel thei uhhi. Teeklua ta uh ahihman un
Mopawi sung in na lususu kha uhhi.
·
Japan
gam Tokyo khuapi sung leh akhanglam Izu Oshima island dungteng Typhoon huihpi
in 10/15/13 ni in nasiatak in nawk ahihman in mi 18 asi kimuta a mi 30
mangthang laai hi ci in Japan kumpi te in 10/16/13 ni in taangkokhia uhhi.
·
Syria
gam Deraa province sung ah Mini Bus khat in Mine siikkha ahihman in mipi 21 si
hi ci in London khua aphualsaat Syria gam mihing zaleenna kanpawl in 10/16/13
ni in taangkokhia uhhi. 10/15/13 ni mah in Kurdish thautawi te leh Al-Qaeda
thautawi te kidona hang in Hassaka kuam ah mi 41 si hi ci in genbeh uhhi.
·
P5+1
kici Leitung ah a thahaat gamte ahi Britain, China, France, Russia leh US) plus Germany gamteng leh Iran te Geneva khuapi ah
Iran Nuclear vaai 10/15-16/13 ni nih sung nasiatak in Iran tetawh kikumkhawm uh
a tutung a thukikupna peen kician in thupi mahmah ci in EU Makaai Catherine
Ashton in genkhia hi. Thu kikupna azompeen November 7-8 ni hiding ci in genbeh
hi.
Khialhna aom khaak aleh ngaihdambawm ah maw
Thang Khawm Pau ZOMi
