Rev Dr Chin Do Kham asihma anunung peen Laaigelh Zomi Khawmpi Lamka ah agensawm

Zomite Tuibang Kigawm-in Mapang Khawm ni

By

Chin Do Kham, D.Min., Ph.D.

General Secretary

Global Zomi Alliance

Thumasa

Pasian in leitung ah minam khat a hong bawl Zomite ihi hi. I pu i pate hun lai-in, lokho singpua in Zogam kuam a, singnuai gammual ah na nungta uh hi. I pupa’ gam Zogam panin khuahun zui-in mun tuamtuam ah i kikhen hi. Gam le lei a ngak Zomite i om bangin, leitung gam tuamtuam ah a lomlomin zong i teng ta hi. Pilna, neih le lam, sep le bawl ah midangte tawh nungta khawm, vaihawm khawmin i om ta hi. Zogam Zomite bek hi nawn loin, Leitung bup a huam Zomite ihi ta hi.

Ka phawk kikkik thu khat in, ‘Koi mun koi gam-ah i teng zongin i Zomi hihna a kipaikhia thei lo” cih thu ahi hi. America gamah ka ten zawh kum 23 cing khin ta hi. Mikangte tawh kiveng khat-in, nasem khawm, an ne khawm tui dawn khawm-in ka om uh hi. Ahi zongin, America-a a teng, America gammi ahi, Zomi mah ka hi tawntung ding hi. Bangzah takin English ka siam zongin, mikang an ka ne zongin, mikangte lamsa innah ka teng zongin mikangte in, “ei mikang te” hong ci ngei lo ding uh hi. ‘Asia pan hong pem Zomi pa’ hong ciden ding uh hi. Kei le kei mikang pau siam kisa-in, mikang an bek lim ka saphial zongin, Zomi ka hihna bei ngei lo ding hi. Zomi ka hih lam selbawl a ka nuntak leh kei le kei a kineih, kei le kei a kikhem, hehpih huai Zomi pa ka hizaw ding hi. Zomi ka hihna kei deihtel tawm hi lo hi. Pasian hong piansakna, ka pianpih ahi hi. Zomi khat ka hihna zumpih loin ka hihna bangbang-in, midangte tawh ka kizop ciang bekin kineih na a om nawn lo lungsim suahtakna ka nei thei hi. Zomi ka hihna ka kiphatsakpih kei a, ka angtan pih hi. Ka neulai-in Zomi ka hihna ka maizum pih ngei-a, ka upat ciangin Zomi a hong bawl Pasian tungah lungdam ka ko zaw hi.

Kicintakna nei lopi mah, Leitungbup Zomi Kipawlna GZA (Global Zomi Alliance) ah makai khat a hong kitel manin hampha ka kisa hi. GZA in Zosuan tate a nungta Pasian bulphuh in, itna tawh kipumkhat a, a bucing khantohna neih theih nading a vaihawm kipawlna ahi hi. Tu ni-in Lamka khuapi a kibawl The 3^rd World Zomi Convention ah GZA Central Committee tangin kong kihel khak manin ka lungdam hi. A vaihawm Zomi Council le makai mimal tampite tungah lungdam kong ko hi. 

Global Zomi Alliance (GZA) Hong Piankhiatna

GZA hong pian khiatna thu tawm hong pulak nuam ing. Burma gamsung Zomite tenna Zogamah American missionary ahi Joseph Herbert Cope le a zi Elizabeth te sangmang nasem ding a hong tun (1910) zawh uh kum 100 cinna khawmpi “Cope Centennial Jubilee Celebration” November 25-28, 2010 sung Tedim khuapi ah nasiatak in kibawl a, mipi 20,000 bang hong kihel thei uh hi.

Tua khawmpi hunsung, December 27, 2010 ni sun laitak-in, mun tuamtuam pan hong pai makai 70 te maitang kimu khawmin holimna kinei hi. Tua hun sungah, “Zogam sungah Missionary masa pen Cope te nupa hong tun zawh kum 100 cin pawi bawl ngeingai a, innlam zuatkik ding ciangbek hisak loin, kum 100 cin khit mailam ah Zomite i kalsuanzia hong makaih ding makai pawlkhat kiseh-in, tuate in Zomi bup hong makaih uh hen!” cih khensatna kinei hi. Tua hunsung mah in, makai dingin hih a nuaia teng kiseh hi. (Tua hunlai-in Burma kumpi kikhel nai lo ahih manin gam nih kikal kizop dan a buaihuai khak ding lung hihmawhna tawh Kawlgam lam a makaite bek a kiseh phot ahi hi.)

(1). President - Rev. Simon Pau Khan En, Ph.D.

(2). Vice President – Bishop Felix Lian Khen Thang, J.C.D.

(3). General Secretary – Rev. Chin Do Kham, D.Min., Ph.D.

(4). Assistant Secretary – Rev. Do Suan Mung, D.D.

(5). Member – Rev. Gin Khan Khual, Ph.D.

(6). Member – Rev. J.M. Ngul Khan Pau, D.Miss. (a nung ciang guanbeh)

Khawmpi hun sung December 28, 2010 sun hunpi sungah Pasian nasem 200 val le khawmpi sim a hong pai mipi khempeuh in a kiseh makai 5 te a dingin, Pasian tungah thungetsakna tawh apna kinei ziahziah hi.

Hih maban zomin, April 27-30, 2011 sung Singapore a om Zomite inntekna le panpihna tawh makai 5 teng in Singapore ah a masa pen meeting nei uh hi. Makai 5 tengin India lam a Zomite sung pan hong kihel loh phamawh sa ahih manun Dr. J.M. Ngul Khan Pau le Evangelical Baptist Convention (EBC) a Executive Director (by designation) te Central Committee member a behlap dingin khensat uh hi. Phone le email tawh zotna (invitation) kinei a, Dr. J.M. Ngul Khan Pau in hong sang pah hi. Tua laitak a EBC Executive Director a sem Rev. Kham Khaw Lun in email tawh lai hong khakkik a, ‘Mailam ah damdamin hong ngaihsun lai nung’, hong ci hi.  Tua hun a kipan Dr. J.M. Ngul Khan Pau tawh kigawmin GZA Central Committee Member 6 tawh vaihawmna a kinei toto ahi hi.

GZA Ngimna Bulpi le Kivaipuakzia

I.  Kipawlna Min:

    Hih kipawlna min in “Global Zomi Alliance” kici ding hi.

II.  Kipawlna Huam:

    Hih kipawlna in leitungbup a om Zomi khempeuh a huam ahi hi.

III. Minam Min:

    Tangtawng a kipan i pu i pate “Zomi” ci-in na kilo uh ahih manin, i minam min pen “Zomi”

    mah kiciden ding hi.

IV. Vision (Ngimna):

Hih kipawlna in Pasian bulphuhin Leitungbup Zomite kipumkhat a, a bucing khantoh nading ngimna tawh kipawlna ahi hi.

V. Our Role (Panmun Lakna):

Hih kipawlna i ngimna ahi kipumkhatna le a bucing khantohna a tangtun theih nadingin kipawlna makaite in Pasian thu siksanin a kisapna zui-in hangsan takin mipite lamlak ding hi. Hih kipawlna in hong uk kumpite tawh kizopna hoih nei-a, a piantheihnate ah gam le minam a dingin sepkhop ding lunggulhna nei hi

Global Zomi Alliance i ngimna bulpi ahi, Pasian bulphuhin Leitungbup Zomite kipumkhat a, a bucing khantoh nading ngimna a tangtun nadingin kivaipuakzia ding Unity le Development ci-in nampi nih in kikhen hi. Kipawlna i tup le ngimnate a tangtun nading a, a semkhia dingin Standing Committee 15 kinei hi.

A. UNITY: Hih Section (A) nuaia vaiteng pen leitungbup huamin kivaihawm khawm ding hi.

1). Unity and Fellowship Committee

2). History, Culture and Literature Committee

3). Zomi Linguistic Committee

4). Public Relations Committee

B. DEVELOPMENT:  Hih Section (B) nuaia teng pen a mun a gam (e.g. Burma gam, India) zui-in kivaihawm ding hi.

5). Education Committee

6). Ecology and Environment Concern Committee

7). Public Healthcare Committee 

8). Agriculture and Livelihood Committee

9). Media and Communication Committee

10). Community Development Committee 

11). Women Committee

12). Youth Committee

13). Music Committee

14). Sports Committee

15). Finance Committee

                         

GZA Maban

A khatveina GZA Khawmpi Kalaymyo khua Agape Ministry Center ah December 14-18, 2011 sung kinei a, Burma le India pan hong pai Zomi makai 345 hong kah thei uh hi. Tua khawmpi sungah, hih a tunga, Central Committee-te khensatna ahi kipawlna min, ngimna bulpite le kivaipuak zia dingte a kipan Committee 15 minte delegate khempeuh in khutlapna tawh kipsakna kinei hi.

Khawmpi hun sungah sep khiat ding vai thupi khensatna pawl khat kinei hinapi in, Burma gamsung kumpi lam kikhelna lianpi hong om ciangin, gelna bangin kisem khia khin theipah lo a, khua hun kikhel dan hungaih kawmin mailam ah zoptoh dingin kikhensat hi.

Tunai ciangin, Burma kumpi zong hong kikhel mahmah ta ahih manin India le Burma gambek hi loin leitung gam tuamtuam a om Zomite “khut khat tawi khe khat khai” bangin ma i pan khop theih ding hun hong tung ta hi. GZA pen Zomi a kici khempeuh huamkim a kipawlna ahih bang mahin, khutzepsa in gal et lo a, ma i pankhop ciat nadingin GZA Central Committee pan kong zawn uh hi.  India gam a om Zomite, Burma gam a om Zomite le tuipi galkai Zomite tuibang luangkhawm in mapang khawm ding hihang.

Thukhupna

Zomite hong kikhenthangsak ahi kumpi ki-ukna gamgite, biakna pawlpi kibat lohnate, kampau awsuah kibat lohnate, khua le tui kibat lohnate panin leitungbup Zomite kipumkhat a i kalsuan khop ding a kinaksap mahmah hun ahi hi. I kilamdannate uangsak zaw loin, i kibatna (Common Ground) thupisak in i lungsim puakziate picingsak ni. Nampi lungsim pua ciat ni. Zomite picing leng mi namdangte muan le suan i suak dinga, kua man hong simmawh zo kei ding hi.

Tuni a kipan in tuilu tuitaw, sak le khang, nisuah nitum, gamsung gampua le tuipi galkhat a om Zomi khempeuh sikhat namkhat i hihna kipsak semsem ni. A nungta Pasian bulphuhin kalsuan khawm ni. Zosuan tate tuibang luangkhawmin, maciang suan khawm leng “Sian in lumbang hong sung ding a, Zogam nibang hong tang ding hi” (Zogam Lalpu). “Ei le ei ki-it keileng kuan hong it ding? Ei le ei kikhual kei leng kuan hong khual ding? Ei le ei kisia leng kuan hong gum ding” (JK Kam).

Zomite sabang tatna mual le guam in hong khen hangin leitung khantohna ahi email, internet, phone, video te tawh kizom thei ta hi hang. Mai lam ah i kizopna hong manlang semsem dinga, mimal a kimuh khopna zong hong tam semsem ding hi. Tua ahih manin Pasian muanna tawh Zomite mailam ding LAMETNA lianpi ka nei hi. Van le lei a piangsak vanglian Pasian in a teltuam Israelte a ompih bangin Zomite hong ompih-in, hong makaih den ta hen!