BUANLI KHUA TANGTHU

BUANLI KHUA TANGTHU Buanli khua tangthu tawh kisai pen Sia Pum Nang bawl Zomi Encyclopedia Volume I sung pan a kila ahi hi. Buanli khua tawh kisai gen dan leh muh dan tangthu tuamtuamte zong a cing thei penpen dingin i gualsuk ding hi. (1) Buanli khua Masa Tangthu (i) Khuasat Ma Hun AD 1600 hun lai in Vaiphei Pu Mang Ngul in tu laitaka Buanli gam sung khuamun, khuatang mun, lotual mun, lentang mun leh tuiphual mun teng huamin Dimpi khua panin inn 300 tawh na teeng ngei a, Elliang-uum vum pan a khuatang dung tai 7 cia na huam hi. (ii) Khua Min Vawhna Pu Mang Ngul a khanlai in lawi 99 na khawi ngei a, a lawite bualna munte tu hun dongin omlai hi. A lawite bualna mun tengah buan bekbek tuili bangin cing liang ahih manin tua mun teng min lawh nadingin Buanli kici pah hi. Hih Buanli mun kici pen tulai Buanli khua panin tai 3na mun ah kimu thei lai a, Sumtui lui ahih keileh Dallawn lui zong kici hi. Hih hunlai in Dallawn lui tawh kisai in hih bangin la na kiphuak ngei hi. (a) Na dangnal gua bang a tak a leh dallawn tuisiang na tawi aw Dim Hau nu aw. (b) ? (iii) Buanli Khua Masa Tawl khat khit ciangin Pu Mang Ngul in a khuapihte tawh tulai Buanli khua mun tengah na kikhin uh a, mun min kivawhsa zui in Buanli khua ci uh hi. Tu laitak huna Buanli khua khunga suangpi pen Pu Mang Ngul kongbiang sana om suangpi hi kici hi. Pu Mang Ngul hunlai in Buanli khua inn 700 ciang na pha ngei a, ahi zongin khua khat leh khua khat galin kiman den uh ahih manin khua pan mun dang ah taikek mang uh hi. Nahlan, Khuangphah, Suangtal, Mimbung leh Lamka khuate ah kilal khia mang ahih manin Pu Mang Ngul khua satna ah Buanli khua masa hun hong bei ta hi. A sanggam pa Pu Sing Keu zong galte in matsak a, Tuiluak lui ah a luang kipai in, tua mun pen tu dongin Singkeu li kici lai hi. *** (2) Tu laitaka i teenna Buanli khua thu (i) Buanli Khua Satna ding Thupiang Pawlkhat Buanli khua pen Lamzang, Muizawl leh Tongsial khuate panin unau pawlkhatte leh a kithutuak lawmta pawlkhat teng kiciamin a sat uh khua khat ahi hi. Buanli khua sat nadinga thupiang pawlkhat a nuai a bang ahi hi. 1890 kum an pawi khit (khai tuh khit), Mikang kumpite in Tedim a lak khit phetun, Salap (Lamzang) khua simin hal uh hi. Hih Salap pan galtai mite a tamzaw Ngiatzang tung uh a, pawlkhatte Muizawl khua ah na tai uh ahih manin a kigawm kik nading uh khua thak khat sat hong kul hi. Galtaite Ngiatzang ah teeng suak uh a, tuhun ciangin Lamzang kici hi. Tua khua pen Pu Eng Khual (Kawngte) in bang a ci peuhmah hiam ci in aisan hi. Ngeina bangin vok goin guapi (bamboo) thum tak suangthu bangin phut a, a nuai ah meilah de in phuisamin ai a san leh man nai lopi in a Aktui puakkham a, tolhkhia mang hi. Hih thu hangin Kawngte tultawi Pu Eng Khual in, “Nupa kikhantul nuamte khua dang ah lalta un. Lamzang khua munsia hi” ci in amah zong a sanggampa Pu Lam Sel tawh Muizawl ah lal pah vingveng uh hi. Tua mah bangin Lamzang khua panin mun tuamtuam ah hong kikhenthang uh ciangin unaute kigawm kik nangin khua thak khat sat ding hong kisam hi. Hih bangin Muizawl, Tuicinlui leh Tongsial khuate ah hong kikhenthang mang ciangin Pu Hau Khai leh Pu Vum Vial in a vekun sam a, “Sim ah, mal ah na kikhenthang kei un, tulkhatin om unla, annek tuidawn a cimawh zawzaw na ki-enkhial kei un, khua thak khat satin na kigawm kikta un,” ci in vaikhak hi. Hih thu thum teng hangin Salap (Lamzang) khua pan a kikhenthang teng kipawl kik uh a, 1895 kumin khua thak khat sat uh hi. Tua khua thak pen Buanli khua na ci uh hi. (ii) Gam Etna Lamzang khua ah Pu Hau Khai leh Pu Vum Vial hong sih khit ciangin, a thu vaikhakte uh a tate in phawk gige uh ahih manin, Pu Lam Sel makai in khua thak sat theih nading gam en dingin Pu Khat Suak leh Pu Sel Neng tawh va pai uh hi. Buanli khua mun a tun uh ciangin tu huna Sabual mun ah zan giakin leitang lukham uh a, phuisamin aklui zangin aisanna leh mang aisanna zong nei uh hi. Zingsang khua hong vak ciangin gam hoih hi cih thu ngah uh ahih manin lungdam takin hong ciah kik uh a, a nuai a bangin la na phuak uh hi. Pu Lam Sel La (a) Phung aw galkhua va dak ing e, lummei in kai zo ta e. (b) Lim kaina gam sau sang a, ka sialsawm ding melmang e. Pu Sel Neng la (a) Gil buhal khuan ngai ing e, zalmang dawhin san ing e. (b) Zalmang dawhin aisan ing e, taikhua hong val khuasiam tangbang pha ci e. (iii) Khua Satta Buanli khua sat pu leh pate pen a hang tuamtuam tawh a kithehthang ngeite zong na hi uh a, Buanli khua hong kisat taktak ciangin Mualbem, Pakzang, Lamzang, Muizawl, Tuicinlui leh Tongsial khuate panin kiciamin hong kuankhia uh hi. Kawngte sung pan khuasat ding tengin Lamzang innpi ngak ding leh mun ngak ding teng kiseh uh a, tua lo teng Tongsial khua ah kigawm photin kum thum sung tanglu tawngsak phot uh hi. 1895 kum ciangin Buanli khua na sat uh hi. Buanli khuasat makai pupi teng a nuai a bang ahi uh hi. (1) Pu Lam Sel Khuasat makaipi (Kawngte) (2) Pu Sel Neng Hausa pi (Kawngte) (3) Pu Eng Khual Dawisa, Siampu (Kawngte) (4) Pu Leng Gin Tulpi (Kawngte) (5) Pu Khat Suak Tangsuak (Kawngte) (6) Pu Neek Vungh Siksek, Zabawm pua (Sektak) (7) Pu Kip Thual (Kawngte) (8) Pu Suak Cin (Kawngte) (9) Pu Ngul Thawng (Kawngte) (10) Pu Vial Zen (Kawngte) (11) Pu Neek Gin (Kawngte) (12) Pu Lam Neng (Kawngte) (13) Pu Awm Langh (Kawngte) (14) Pu Khual Neek (Kawngte) (15) Pu Lam Vum (Hatlangh)* (16) Pu Zel Kam (Kawngte) (17) Pu Neek Cin (Tunglut) (18) Pu Sing Gin (Tunglut) (19) Pu Khai Vungh (Kawngte) Note: Pu Lam Vum pen Buanli Khua kum 100 cin Laibu sungah Kawngte ci in kigelh kha a, a mah pen Kawngte hi loin Hatlangh ahi hi. Tua hangin hih sungah Hatlangh tawh a kilaih ahi hi. Buanli Khua a sat khit a sawt lo a tung pah teng (1) Pu Khul Pau (Thawmte) (2) Pu Eng Kham (Phaipi/Suankhup) (3) Pu Son Khup (Phaipi/Suankhup) (4) Pu Hen Za Nial (Hatlangh) (5) Pu En Zen (Hatlangh) (6) Pu Go Dai (Gualnam) (7) Pu Vum Neng (Buansing) (8) Pu Hang Neng (Buansing) (9) Pu Thual Pum (Bawmkhai) (10) Pu Thuam Pum (Sukte) (11) Pu Lian Zen (Sukte) Tua ahih manin Buanli khua sata kipan tu ciang a om Beh min teng a nuai a bang ahi hi. (1) Kawngte (2) Sektak (3) Hatlangh (4) Tunglut (5) Gualnam (6) Phaipi/Suankhup (7) Bawmkhai (8) Thawmte (9) Buansing (10) Sukte (11) Ngaihte (iv) Tonzang Ukpipa kiangah Hawhna Buanli khuasat pupite in khua a satcil un inn 30 cing pah lo uh ahih man leh phalna ngah lopi in banghangin khuasat cih thute a gen dingin Tonzang innpipa Pu Hau Cin Khup in a vaikhakna zui in Buanli khua makai Pu Lam Sel va pai a, innpi pa tawh kihona tampi a neih khit uh ciangin a nuai-a bangin thukimna hong nei uh hi. (a) Buanli khua inn 30 a phak nadingin Buanli ten hanciam ding (b) Buanli gamgi Pu Lam Sel ngetna bangin innpipa in kipsak ding (c) Buanli khua ah Pu Thuam Lian (Mawngken, Sukte) in Hausa sem ding (d) Innpipa in Buanli khua a kipin sang ding cih teng ahi hi. Hih a tunga thukimna om bangin Pu Lam Sel leh Pu Khat Suak, Mawngken ah pai pah uh a, Hausa dingin Pu Thuam Lian va la pah uh hi. Tonzang innpipa tungah zong lungdamkohna in sialpi khat pia uh hi. Tua sial pen Buanlite khawi dingin innpipa in hong ap kik ahih manin Japan hun dong kikhawi a, Sial 30 dong phasak uh hi. Tua hunin innpipa Pu Pum Za Mang in Buanli Hausapa Pu Suak Langh, sial talpi khat pia kik a, tua lo teng Tonzang ah kipuakin innpipa ton sialin kizang hi. (v) Buanli Khua sat huna la kiphuakte Khanglui lai bek hi loin, tu hun ah zong nasep lianpi khat a sep zawh uh ciang, lungkhamna, dahna khat peuh a tuah ciangun ahi zongin Zola na sut tangtang uh hi. Zola pen a thupi mahmah khat leh a muibun mahmah khat ahi hi. A diakdiakin khanglui lai in a tuah uh thu leh la khempeuh Zola in na bawl pahpah uh hi. Tua mah bangin, Buanli khua a sat lai un zong Zola mah na phuak uh hi. Pu Lam Sel la; 1. (a) Mun in tam ven sau phazaw ven vangkhua hai bang ngak ve aw. (b) Ciin tawh tuai tawh phung nih thum tawh hai bang ngak ding vangkhua lumsuang bang kip e. 2. (a) Simlei tual a nuamzaw, zanglei tual a nuam zaw, zanglei tual ah ka sial gelin cing sang e. (b) Tun min zua min i lawhnasa simlei tual bang om lo e. 3. (a) Thei bang sena al bang hong tah tun ngaih pawh siamsa nang e. (b) Tun ngaih siam aw, tongdam nem aw, von teng huai a siam aw e. Pu Sel Neng La: (a) Khua vasang khua vasang e, litui ah khua vasang e. (b) Litui vangkhua phai bang ka sat ka sau zaw zam zilzial e. Pi Cing Hial la: (a) Ka zua khattang tuldawh zah a meng aw e. (b) Singta gam zang nahsing nuai ah phung aw hong hawmsiam ve aw. (vi) Falam Menzi Zum ah Hawhna Buanli khua sat pupite in Hausa dingin Pu Thuam Lian a lak uh hangun, tuk an tung man loin kamsiatna tawh a zi hong si ahih manin, Hausapa lunglengin, “Buanlite aw, nomau leh nomau mah na ki-uk kik ta un,” ci in Mawngken khua ah hong ciahsan hi. Tua thu hong om ciangin Kawngte innpi Pu Sel Neng in hausa hong sem kik hi. Hih bang thupiang teng hong om ciangin khuakim khuapamte in Hausapa ciah ahih manin khua kip lo ding hi, ci in kamdawn a ginsak uh ciangin, khua upate kikumin hong vaihawm uh hi. Khua kip nading Falam menzi zum ah thudong dingin Pu Lam Sel tel uh hi. Pu Lam Sel in zubawm pua Pu Neek Vungh leh upa nih leh thum tawh Falam Ukpipa kiangah thu va dong uh hi. Falam Menzi Pu Chon Bik in, “Lam Sel aw sing puak na hahkat in” ci hi. Tua hangin pute in a nuai a bangin la na phuak uh hi. Pu Sel Neng la: (a) Ka mun inn leh ka gam lo ka ngaih manin zangsih khuam bang do ing e. (b) Zangsih khuam bang na do a, ma na zam leh na gam lo taan aw ci e. Pu Lam Sel La: 1. (a) Singa pau guala pau in e, na mun inn leh na gam lo taan aw ci e. (b) Lungmuan mawng e, sakciang vaimang tong ka dot leh tuukawl tawi siam aw ci e. 2. (a) Litui vangkhua zua nih thum ten sakciang vaimang bia aw ci e. (b) Tongsan in lah hong thei keng e, tua ka sinlai tawl sang e. (vii) Buanli Khua Thaute (Gun) Thu Buanli khua a kisatcilin thau lawng li kinei hi. Khuasat huna kipan tu ciangdong thau lawngli om hi. Khuasat thau a kem teng: 1. Pu Lam Sel 2. Pu Sel Neng 3. Pu Khat Suak 4. Pu Neek Vunghte ahi uh hi. Ahi zongin sawtpi khit ciangin Pu Hau Cin Khup in thau lawng thum bek nei thei ding a cih ciangin ap nuam kuamah kiom lo hi. Tua bangin a ap nuam kuamah a om loh ciang, Pu Sel Neng tapa Pu Lam Pau in ama thau a tawi kimlai Tonzang innpi ah pai vingvengin va ap hi. Buanli Hausa Laipi BUANLI HAUSA LAIPI Buanli Villange……………… Kam Hau Tract. Name of headman…………… Kham Dai. Fathers name………………... Lam Pau. Date of appointment………… 24th November 1945. Vide V.P. No 108/39/57 T of 1945 Dated 24.11.1945 From S. C. A. O Ceicle No.6 (Gup. No. 408/35/1945.) Boundary North : Following the Lawibuallwi till it meets the Phillui South : Following the Khuamvumlwi till it meets the Junction with Phillui. East : Conflucence of the Phillui. West : The lentang range or Innbuk range. Kham Dai, son of Lam Pau is elected as headman for Buanli Village. The other councillors duty elected are; 1. Kham Za Kam 2. Vungh Tual 3. Neng Zel ****************************************************************