Tulaai Leitung Thuthang
tuamtuam updates October 28, 2013
·
Oct
25, 2013 FGATulsa Homcell Combine Service kikhop khit nuamtak a innlam zuan
ahi,Pa Kam Khual, Niangpi,Uappi,Zomnu leh Muangpi te lamet loh laitak in
Delaware 81st tung ah Mawtaw ki phutkhak na hang in,St Francis Zato ah Cing
Sian Uap@ Uappi in 10/27/13 ni in ongnusia a, Palik ten athu siang sanaailo
ahihman avui niding kician naailo hi.
Mawtaw kitaihna thu Palik te genna ah
ataih te khial a, asi kisit in asisitna result ngaaklaai uhhi. Asisit na result
tungtawn in akimatdaanding kicianpan ding ci hi.
Kawlpi ah Laaigelh siam Tg Dal Khan
Kap mawtaw cycle in 10/26/13 ni in phukha
in ongnusia hi.
Aizawl khuapi ah Accident mah in Zomi
khangno Tg Dal Suan Lian in 10/27/13 ni
mah in ongnusia hi.
Hih atung thuteng i-et ciang tu Tu
nithum sung bekbek in Zomi Lia leh Taangpaal ithuai mahmah 3 kisum himawk zen
ban ah 10/13/13 ni I Makaapi Dr Kham in ongnusia laailaai cih peen Zomi
akua mapeuh in naakpi tak ngaihsun in
Zomi te Topa aw koi ah omnahiam ko ong nunghei in ci in kikociat ni.
Adah akap kheempeuh Topa Khasiangtho
in onghehneemta hen.
·
India
gam Lamka khuapi a kibawl athumveina Leitungbup Zomi khawmpi buaina omhetlo in
lawhcingtak in kizo ta hi. Hih khawmpi sung ah adiak in Leitung bup a om Zomi
sung ah amaaidawk kheempeuh akim hiphial a, International Standard level mahmah
khawmpi khat in kimu ahihman in Khalkha te bang ai mitdeh bang uhhi.
·
Kachin
gam Bamaw huam Mongdeng khuakiim ten gah 10/24/13 nipan kawlgam gaalkaapte
athuang athuang in tungziahziah ahihman in khuasungmi 500 vaal lungmuanna mun
zong in gaaltaai keek uhhi. Kachin gam Mitkyina khuapi ah Mualtung thautawi
palaaipawl thukikupna tu 30-November 1 nidong thukikupna neiding in tulaaitak a
kumpi te phalna angah uh hia, tun gaalkaap te tua huhau in athuang athuang in
tungcihpeen Kawlgam kumpi leh Gaalkaap athu uh kituaklo lawngkhat a ginglo cih
kimuthei hi.
·
October
kha 30 nipan November 1 nidong Kachin gam KIO te phualpi Laiza khuapi ah
thukikumding in Mualtungmi thautawi kipawlna 10 pan palaai 32 te 10/28/13 ni in
Mitkyina khuapi tungziahziah ta uha, UNFC pan makaai 12 te Laiza khuapi tungta
uhhi. 1947 kum akibawl Pinglong khawmpi
mahmah bang hi ci in Mitkyina khuapi aphualsaat PCG pan U San AUng in genkhia
hi.
·
Phalna
omlopi in Kawlgam pan Thailand gam puaisa tawh aluutsim mi 30 te 10/27/13 ni in
Thailand thuneite in Ranawng khuasung ah man uhhi. Hih mi 30 lak ah naupang kum
18 nuai mi 2 kihel hi ci in Thailand palikte in 10/28/13 ni in genkhia uhhi.
·
Bangladesh
gampan kawgam sung ongluutsim sawm
Bangladesh mi 30 Rakhaing gam Chengkhari khuanawl tuitung ah kawlgam palikten
10/27/13 ni in man uhhi. Gunkuang tawh
ongpai uh hi a gunkuang tung ah mi 150 atuang hinapi 30 bek manzo in
adangteng taaimang uh ci in gen uhhi.
·
Italy
gam atung Kawlgam Democracy makaaipi leh NLD makaaipi Daw Aung San Suu Kyi
10/28/13 ni in Vatican khuapi aom Pope Francis kiang vahawh in vakimukhawm
uhhi. Pope Francis in Muhdahna,Launa cih te in mihingte Man leh Nuntaakna
amawkna suaksak cih thulutawh thu nahilh ahihman in Daw Suu piangthak dektak hi.
Daw Suu I Democracy hanciamna te Pope in thu kimpihna genkhia hi.
·
India gam Bihar state Patna khuapi sung ah 10/27/13 ni in
Bomb tang 6 puakkham ahihman in mi 5 si in 80 vaal liam uhhi. 2014 India gambup Prime Minister kiteelna ah
ademding BJP party MP Narendra Modi in mipi kaaikhawm in athugenlaaitak hihbang
a Bomb puakkham ahihi.
·
China
gam ah aminthang mahmah ahi Tiananmen Innpi aluutna kongvang mawtaw khat in
10/28/13 ni in ginneihloh pi in taihkha
ahihman in mi 5 si a 38 naakliam mahmah hi.
·
EU
gamsung teng 10/28/13 ni in nasiatak in
huihpi leh guahpi in nawk a , mi 13 asi kimuta in singkung te kipuk in Inn le Lo, mawtaw tampi tak dengsia mang hi.
Engineer te in asun azan in naseem ziahziah uha, Tulian in Inn 625,000 in mei
neilo uhhi.
·
East
Africa gamteng auk ahi Al-Qaeda migilote kipawlna Al-Shabab makaaipi nih 10/28/13 ni in US Commando
te in Somalia gam Vanlaai pan muitum in golum hi ci in BBC in genkhia hi. Nungkha pan asuul zuih uh
hi in tun agozo taktak uh ahihi.
·
US
gamte in akhut kiletpih uh EU makaaiteng phone aw akhumsim na hang in EU
gammakaaite naak heh mamah uha 10/28/13 ni in Germany thukanlian te US gam tung
ta uhhi. Tuaban ah Spain gamte in zong
US tung ah 10/28/13 bangnadeihna uh ci in khauhtak dotna bawl uhhi.
·
US
gam Prsident Obama in FBI thukan makaaipi ding in James Comey kum 54 za kipia ta hi ci in 10/28/13 ni in
taangkokhia hi. James Comey peen asia apha akhenthei mipil khat ahihban ah Bush hunlaai Thukhen
maangpi nihna aseem ahihi. Asawtlo in Tulaaitak aseem ahi Robert Mueller mun
onglaih ding hi.
http://buanli.blogspot.com
