Thursday, October 10, 2013

Tulaai Leitung Thuthang tuamtuam updates October 9, 2013




Tulaai Leitung Thuthang tuamtuam updates October 9, 2013 


·        Kachin minam thautawi KIO te leh Kawlgam kumpi kilemna bawlpawl aninihna 10/9/13 ni in Mitkyina khuapi ah nuamtak in kikumthei uhhi. Tuni thukikupna sung ah langnih kikaapna aomnawnloh nading in gaalkaapte kepziading leh Maikha sung a kibawlding Kawlgambup kilemna Suaikaihna ah KIO akiheltheihnading kikuppi in nei uhhi ci in Bu Guam Maw in genkhia hi. Atawpna leh anithumna 10/10/13 ni in kikumsuakding uh a, Thukimna omsa nam 5 te taangko khiattheih nading kikumtoding ci in genbeh hi.

·        Kachin gam Mitkyina khuapi ah KIO leh Kawlkumpi te thukikupna thungai a apai Mualtungmi thautawi kipawlna 10 te leh UN pan thukan a pai Mr  Vijay Nambiar te atuam in 10/09/13 ni in kimukhawm uha, Mualtungmi thautawi kipawlna khenkhat in kawlkumpi tawh kilemna bawlkhin hinapi akikaap teiteina ahaang kikumkhawm uhhi ci in KNU Secretary Badu Saw Kuai Thu Win in genkhia hi.


·        Asian lawmta gam 10 makaaite khawmpi Brunei gam ah kah in South China Sea buaina tawh kisai China leh Asian gammakaai te kikaal ah palaaiseem in thuhoihpeending in haanthotna kapiading ci in US President Obama in kamciam apiakna US gamkumpi sung buaina haangin ciampeel a ahizong in ama taang in Secretary of State John Kerry vakah thei hi. Hi Asian khawmpi amanni 10/10/13 ni in Kawlgam President U Thein Sein in 2014 Asian lutangpi panmun sanna neiding hi.

·        USA gam I Central Bank  President pa  Mr Ben Bernanke  a term nihna January 31,2014 ciang beitading ahihman in amamun aluahding in President Obama in Janet Yellen kum 67 sepsakding in thusunna 10/09/13 ni in nei hi. Azenzen in Obama thusunna hoih akisaktek a leh tuma 100 sung 2qpan kipan Janet Yellen peen  amasapeen US Central Bank President hiding hi.

·        USA gam kumpi nasepna pawlkhat adinkhawlna akipat kiktheihnading leh US kumpi sumleitawiding khan nading ngimnatawh President Obama in 10/08/13 ni in Parliament dawlnuainung palaai 232 te Innkaangpi ah sam a Parliament dawlnuainung makaai John Boehner in palaai 18 bek paisak ziau ahihman in Obama alungsim na mahmah hi ci in Inkaangpi taangkopa  Jay Carney in 10/09/13 ni in genkhia hi.  Nasep kalsuan ziading koicihding cih President Obama in Democratic Party makaaite 10/09/13 niin kuppih hi. Parliament dawlnuainung Makaai John Boehner inbel Obama deihna kikup ma in US kumpi sumzat khiapding leh Obama Care tawh kisai kikup phatding hi ci in ngen hi. Obama in bel hihbang a kitoto ciangtawh kanungkik keiding hi ci hi.  Sawtkhopkhat buai  mahmah laaiding cihna hi.

·        Libya gam I  Prime Minister Ali Zeidan in kagamsung  migilo ten ongnopneh lua ahihman in onghuh un ci in akikoko laaitak 10/09/13 ni in apawlmin kitheilio thautawi pawlkhat in ateena inn Tripoli khuapi pan mancip in taaipih mang (kidnapped ) hi ci in ama thu taangko Media ten genkhia uhhi.

·        BBC thukizaakna te in Pakistan gam a kibusa Taliban makaaipi Hakimullah Mehsud 10/09/13 ni in thudotna bawl uh a, Hakimullah Mehsud in Pakistan kumpi tetawh kihoding cileh alemsa  in ka om a ahizong in ken kapan masakeiding ci hi. Tuaban ah mipitung ah bangmah tatsiatna kanei kei uha, ahizong in USA gam te leh alawm agualte bel khawllo in kasusu maiding  uh ci in gen hi.

·        Leitung ah sathau haumahmah gam  ahi Azerbaijan gam I President 2003 kumpan aseemto ahi President  Ilham Aliyev in a term thumna President 80% mee tangtawh ngahkik hi ci in Election committee te in 10/09/13 ni in taangkokhia uhhi.



*thusuak peen nisim hunngahlo tawh group kim ah ongsuaksakzolo kahihman in Zomidaily leh   http://buanli.blogspot.com ah nisim kisimthei den hi*

Thuumna: Laaimal kikhialkha leh laaimal kilawmlo, ani ache akituaklo kha akipan kisapna tuamtuam aomkhaak aleh ngaihdambawm ah nongnakhiat sak un maw



Zomipau