Sunday, April 6, 2014

Tulaai Leitung Thuthang Tuamtuam Updates April 5, 2014


Tulaai Leitung Thuthang Tuamtuam Updates April 5, 2014


·      Buanli khua leh Ngente khua ah Census nuamtak kibawlzo a Buanli Inn 60 mimal 500 in 100% 914-Zomi khum in Ngente ah Lusei Inn 3 losiah Inn 40 mimal 400 in 914-Zomi ah khumkim ci in April 5, 2014 phone tawh Hausate kahopihna pan onggen uhhi. Khuasung a sangsia seemte mah in minkhumpah ahihman in lem mahmah hi.

·      Louisville Khuapi Kentucky state sung a om Southern Baptist Seminar saangpi a Th.M asin ahi Sia  Dal Lam Mang@Sia Lampi in ongtungding May 16 niciang in  Th.M Lukhu neelkaai ong ngahtading hi. Amah peen mitampi te in kum tampi sin himah leh kum 1 tawh Th.M ongzotheipah asuahban ah Ph.D (NT) tawh zop theihnading in Application leh thudotna te ah Gualzawhna limcitak ong ngah ahihman in Ph.D ongzomtosuak theiding ahihi. Kentucky Zomi te auap ding in kilawp mahmah hi. Tua ban ah Kentucky Zomi te in Ph.D sangnaupang 2 akinei kingkeng hita ahihman in ka angtang mahmah uhhi.

·      Kawlgam bup gaalkikaap na adaih theihna ding in Mualtung thautawi kipawlna makaaite leh Kawlgam kumpi kilemna makaai te thukimna laaipi khat neihtheih nading amasapeen thukikupna Yangon khuapi kilemna Innpi ah April 5, 2014 ni in kipanta uhhi. Hih mun ah alamdang mahmah in O minam UWSP ,Sangnaupang gaalkaap ABSDF, Shan minam RCSS/SSA te zong kah uhhi.

·      Kawlgam bup kilemnading kivaaihawm laaitak mah in Kachin gam Tanlan kiang ah KIO leh Kawlgam gaalkaap te Kawlgam gaalkaapten gaalkaap tha behlap in gamkeek uh ahihman in April 4,2014 ni in kivik ziahziah uhhi. Tuaban ah KIO khutnuai aom Kachin khua 400 vaalte ah kilemna omnaailo ahihman mikimsim theiloding ci in KIO makaai Boyoke GuamMaw leh adang makaaite in gen uhhi. kawl Gaalkaap ten bel hih khuate ah Gaalkaap ten misimte cing in kisim vevedin ci uhhi. Muhnop mahmah ding in lam et huai hi.

·      Kawlgam Rakhaing state sung ah Rakhaing minamte in NGO leh UN zumte simgawp in ahawlmang na uhtawh kisai thukankhia ding in US Asia Pacific vaaisai  Mr Daniel Russel  April ni 9 Yangon khuapi tungding a ni 10 ni taam in ciahkikding ci in Yangon US Palaai zum te in taangkokhia uhhi.

·      Yangon huam Layko khua sung a om Kawl naupang Puanten zuak khat leh Muslim Puantenzuak naupang khat temkeek tawh akidawtna hang in Kawl leh Kala kikaal buaina April 4 ni nitaak nai 4 pawl in piang a palikte tungpaklo ahihman in mi 9 liam uhhi.

·      March ni 8 ni a amang Malaysia Van leeng ongtungding Monday April 7 niciang ni 30 cingtading a Vanleeng thu akikhumna Black Box a battery beitading ahihman in abeima India tuipi sung ah leitung gamtuamtuam pan April 4 nipan nasiatak zon kipan uhhi. April 5, 2014 ni in China tembawpi in hih Black Box hiding a upmawh aw khat mangkha a amun ah pai in tawp asawm saanlaai tak ahi ci in China te in taangkokhia uhhi.

·      Afghanistan gamte in gambup President ding kiteelna nuamtak in April 5, 2014 ni in kipan thei uh a mipi te in amaudeih makaaite mee piaziahziah ta uhhi. Hih kiteel sung nasiatak in kanawngkaai sakding uhhi ci in Taliban migilo te in lausak himah leh palik gaalkaap kicingtak in kikoih ahihman in buaina lian omlo in kiteelna kipan thei uhhi. Mee piathei mipi 7million vaal om uhhi.

·        Thailand gam Prime Minister aseem Mrs Yingluck  Shinawatra alangpang Democratic party te in Thailand thukhen zum ah akhiatna Thailand thukhen zumte sittel ding saang uh ahihman in Mrs Yingluck adeih mipi te in Puansan silh in Bangkok khuapi laaizang ah lungphona nasiatak in April 5, 2014 ni  kipan uhhi.  Yingluck Shinawatra mawhmatna aom ngeingei leh Tualgaal piangding hi ci in awngziahziah mai uha, THukhen zum ten dawnkikna khat peuhpeuh aneihmasiah zomto suakding  ci uhhi.

·      April ni 3 ni a US gam Texas state Ford Hood gaalkaap leen a mikaap Gaalkaap Ivan Lopez  kum 34 peen Tawmvei tawlnga a Innlam ciahding angetna kipialo ahihman mi akaap hi ci in US thuneite in April 5, 2014 ni in genkhia uhhi. Mi 3 akap lupkhit ciang amah leh amah kikaap lum a mi 16 zong thauma hang in liam uhhi.

·      Brazil gam ah ongtungding 2014 World Cup sung buaina aomloh nading daalkholhna in Vankhaamseem migilo atam mahmahna Rio khuapi sung gaalkaap 30,000 in April 5, 2014 ni in Buluh ziahziah uhhi.

·      Pakistan gam ah Christian Pastor khat leh azi Mohamed gensiatna haangtawh thahlupding in Pakistan hukhenzumpi te in April 5, 2014 ni in thukhen uhhi. Hih Pastor te nupa peen Shafqat  Emmanuel leh azi Shagufta Kausar te hi uha, Nungkum Juluy kha akiman ahihi. Thungetna ah phawk ciat ni

·      Solomon tuikulh ah April 4,2014 ni in Huipi leh guahpi zu ahihman in tuikhang a mi 13 si in 30 mang a , Inn 10,000 tui in taai mang hi. Hih micimawh te  huhna ding in Australia gamten $50,000, New Zealand gamten $256,200 April 5, 2014 ni in huhpak sai uhhi.

·      Israel-Palestinian gamnih kilemnading US ten ahaanciam laaitak un Palestine ten UN ah UN ten gampikhat a aciaptehnading ngetna April 4 ni in bawlkik uh ahihman in Israel ten A 4 vei Palestine thongkiate akhahding uh khawlkik uhhi. Hibang in US in thasaan in kilem nading ahaanciam hang amiten haanciamlo ahihman kalsuanzia atuamkhat in kilaih ding ci in Secretary of State Mr John Kerry in April 5, 2014 ni in gengiap ta hi.

·      Iran gamte in Nuclear kanaak khiap mahmah tading uhhi ci uh ahihman in US ten Iran gam a kizang Boeing Vaanleengpi te phuahphatnading kisam vantuamtuam te zuaktheihna phalna April 5, 2014 ni in piakik ta uha, 1979 pan amasa peen zong ahihi. Ahizong in Boeing Vanleeng thak bel zuakthei naailoding cise kiau uhhi.



Lungdam ei

Thang Khawm Pau Zomi