Monday, April 21, 2014

Tulaai Leitung Thuthang Tuamtuam Updates April 20, 2014

Tulaai Leitung Thuthang Tuamtuam Updates April 20, 2014


·      USA gam ongsiik Kachin minam thautawi pawl ahi KIA makaai Pu Go Mung (Gummaw) leh alawmte thum US Ambassador to UN Ms Samantha Power, Vice State Secretary Ms Wendy Sherman, Mr Rick Barton tetawh April 14-18 niciang kimukhawm uha, US Ulian ten nalim dawn mahmah ban ah Leitung Gaalpi nihna laai a US gaalkaap tampi Kachin ten ahotkhiat na thu lungdamkohna in Kawl leh Kachin kikaal kilemna nasepna ah US naakpi tak in panpihding in kaciam pia uhhi. April 19-20 sung Washington DC kiim a om Kachin minam te leh Chin minamte tawh kimu khawm uha, Mundang  Kachin minamte omnamun te ah paikawikawi in Kachin gam khuahun gending in geelna neilaai uhhi. Pu Go Mung tawh ongpaikhawm te peen Bu Sein Lwin, Bu Gaw LU Lah leh Pi Ya Nan te ahih uhhi. TUihel loh Zomi tezong munuam himah leh thautawi makaai ahihman Zomi ten lau cimawk ee

·      Mandalay Khuapi sung lam 22 leh 64 kituahna aom Mandalay Vuanzi pu U Ye Myint I Inn April 19,2014 ni in kaang ziahziah a, meiphelh mawtaw 35  in nasia tak aphelh ziahziah leh daaisam hi. Lubawk te inn himawk ahihman in ahang kuaman theilo hi. April 20, 2014 zingsang lam mah in Mandalay Yechu gaalkhat aom Yechu Hotel dawlnihna meikaang leuleu in kawlsum in Sang 42 man sum uhhi.

·      NLD CEC lah ahi News Paper Sia lah ahi Hantawathy U Win Tin sunglam natna tuamtuam tawh kha tampi zato ah akibawl khitciang Sia Vuan siam mahmah tampi tak in ahihtheih zah un bawl uh himahleh, April 20, 2014 ni in leitung nusia ta hi.  Amah peen NLD a ding akisam mahmah mikhat ahihban ah mipi it makaai mipil hoih khat ahihi. Asih lian in kum 85 phata a  anatna te peen Kawlkumpi in man in thongsung ah abawlsiatna hang a angah ahihi.

·      Nungdeuh mahmah in leitung a migilo ahi Al Qaeda pawlpi te pawipi Yemen gam ah abawlna uh Thuthang te website pan Video pawlkhat ongkikhah khia a pawlkhat ten US ten theilo hiam acicih laai tak uh April 19-20 , 2014 ninih sungbekbek in US ten Drone kici ahawlpalo tuithe vaanleeng navil sakkhinkhian a, abaanzial ek uhleh Al Qaeda gaalkaap 35 leh nautaang mi 3 nuailum pak uhhi.

·      South Korea gam a kibung tembaw hang in April 20, 2014 niciang misi 64 kimuta a, 238 mangthang laai hi. Tembaw ahawlsiam naailo khat ahawlpipa in ahawlsak laaitak kibung ahihman in Tembaw hawlpipa thunei ten manphot uhhi. Ahimuh khitdong zongding in kumpi thunei ten hanciam mahmah uhhi.

·      Afghanistan gam kiteelnapi kizomtoto a tu ciangciang me tang kisimna ah Dr Abdullah 44% tawh gualzawhna ngah a, Akidempihpa Mr Ghani in 33%  ngah hi. May kha ni 14 niciang azo alel kitaangko tading ahihi.

·      Algeria gam Algiers khuapi nawl mualkuui tung Mawtaw lampi ah Al Qaeda migilo a upmawh migilo pawlkhat in Algeria gaalkaapte April 20, 2014 ni in na ambush uh ahihman in Algeria gaalkaap 14 si uhhi.

·      Finland gam Jamijarvi khuapi tung a gualnuam a aleeng kawikawi Vanleeng neukhat April 20, 2014 ni in kiamawh a atung a tuang mi 8 sikhin uhhi. Ahawl pa leh adang minih te bel Zato inn ah kibawl laaitak uh ahihi.




Lungdam ei

Thang Khawm Pau Zomi