Tulaai Leitung Thuthang
Tuamtuam Updates April 15, 2014
· Kawlgam kumpi te in Kachin gam sung ah Gaalkaap
athuangthuang in puakkeei uh ahihman in April 10 nipan tuni April 15, 2014
nidong kikaap ngeekngeek in mipi 2,000 vaal China gamlam ah gaaltaai uhhi.
Kawlgaalkaap nungthuapte tuanna mawtaw 4 KIA ten Mine tawh puakkhamsak khin
uha, Kawl Gaalkaap Abu Amang akipan 100 vaalsita ci in KIA ten genkhia uhhi.
· 2014 kum taktak ciang Kawlgam zong himahmahlo
ongsuakta mahmahta ahihman in Tutung tuibuahpawi ah Nungak te Puan nangawn silh
nuamnawnloh zahdong in diangziahziah uh ahihman kumpi thuneiten Puansilh zia
kidawmtek ding April 15, 2014 ni in mipi tung ah thupia uhhi.
· KIA Makaai Pu Gomung ( Gummaw) April 15, 2014 ni in
USA gam John Hopkins University a kibawlding Kawlgam Tualgaal tawh kisai
thukikupna ah Meeting kah in adaaitheilo Kachin leh Kawlte kidona tawh kisai
thu vakikupihding ci in US Secretary of State Dept ten genkhia uhhi. US gamsung
a om a U tea hi Zomi makaai pawlkhat tawh zong kimuhkhopna neiding ci in
akithuahpih alawmte in genkhia uhhi.
· Piantit gam tung Pi Suutcing ( Daw Suu ) leh Piantit
President Francois Hollande te Paris
khuapi sung aom ELYSSE kumpi Inn sung ah April 15, 2014 ni in kimukhawm uha,
Kawlgam Politics paaizia, 2015 kiteelpi ciang thuman thutak aomtheihnading
cihte kikum ci in President Hollande in mipi maai ah genkhia hi. Tuni mah in
Piantit Parliament ulian te tawh kimukhawm ding a tuakhit ciang Piantit gam
numei makaaite tawh zong Women’s politics pawlkhat kihoding uh ci in President
Hollande in genbeh hi.
· European kipawlna te in Kawlgam tung ah Gaalvan tawh
kisai akhaaktan na uh ongtungding April 30,2015 niciang ani khanto in
kikhaaktan to laaiding hi ci in April 14,2014 ni in taangkokhia uhhi.
· Kum tampi tak kinialna apiangsak den ahi India gamsung
a Nu lah ahilo Pa lah ahilo milaklawh akeute tawh kisai in numei pasal khenna
mun ah akigelh ciang Numaw-Pamaw-Athumna cihbang in munkhat piakhiatading in
India thukhenzumpi te in April 15, 2014 ni in kipsakna taangkokhiatna neita
uhhi.
· Leitungbup Media lamtawh kisai minphatna ahi
Pulitzer Prize minphatna angahding in
Reuters thukizaakna thukan ahi Jason Szep leh Andrew R.C Marshal te 2014 kum
ading in April 15, 2014 ni in kiteelkhia hi. Hih minihte akiteelkhiatna ahaang
in Kawlgam Rakhaing state sung a Rohingya te kibawlsiatna hangsantak in
apulaakkhiat hang uh cizen hi.
· Central American gam teng ah akhauh mahmah in tuzawh
nai 24 sung in zinglingding hi ci in Khuahunsiam mipilte in taangkokhia uh
ahihman in Nicaragua gam kumpi thunei te in mipi te Innsung pan heemkhia in
muanhuaiding a aupmawh mun uhah tuah kipan ziahziah ta uhhi.
· Malaysia Vanleeng I Black Box zongpawl in Tuipi sung
pi 15,000 dong aluutthei Bluefin-21 kici ahawlpalo Tuisung luut thautang khat
April 14,2014 ni in khahkhia uha, Misi te kha in lamto hiam cihnop huaiphial in
tuisung ah nai 16 aom khitciang athu omlo pi in ongkahto kik mawk hi. Makaai te
buaipian in tawlkhat akhawl khit uhciang lungkim theilo uha April 15, 2014 ni
khatvei khahpha kik uhhi.
· Afghanistan Deputy Minister of Public works Mr Ahmad
Shah Wahid I tuanna mawtaw Kabul khuapi sung ah April 15, 2014 ni in thautawi
mi 4 in khaktan in akapgawp khit uhciang Mr Ahmad man in taaipih mang uh hi ci
in Public Works zumte in taangkokhiatna leh kipsakna nei uhhi. Afghanistan
gamsung ah kiteelpi natawh abuai ngengngang laaitak uhzong hi a migilo te
kisaan mahmah uhhi.
· Ukraine gam nisuahna lam gamteng Russia gamtawh
kigawmding adeih thautawi te in abuluhna uh khawl nuamlo uh ahihman in Ukraine
gaalkaapte hih migillo te bengding in Leilam,Vanlam,Tanks leh gaalkaap athuangthuang tawh April 15,
2014 ni in kipan ziahziah ta uhhi. Russia te in ahihleh Hih Ukraine nisuahna
lam a om Russia mite huutding ko khutsung ah om ahihman gaalkaap tha nongzat
peuh mah uhleh ci in gamgi dung ah Gaalvanleeng, Tanks, Gaalkaap 40 tawh buk
khikhe ta uhhi.
· Libya gam Tripoli khuapi sung aom Jordan Ambassador
Fawaz Al-Itan tuanna mawtaw maaituam
migilo pawlkhat in April 15, 2014 ni in kaapgawp uha, Embassador pa man in
taaipih mang uhhi ci in Jordan Embassy ten taangkokhia uhhi. Tu ciangciang
Jordan Embassy pan hitaleh Libya kumpi tung hitaleh bangmah ngetna thuzaksakna
omnaailo ci uhhi.
Lungdam
ei
Thang
Khawm Pau Zomi
