Tulaai Leitung Thuthang
Tuamtuam Updates April 11, 2014
· WZC makaihna tawh Zomi Political Talk show April 12,
2014 nitaak nai 5-11Pm dong Chicago khuapi ah nasiatak in kibawlding a live in
ettheihding inzong kivaaihawm ihthu kiza hi. Live a etnading makaaiten ahunlap
in ongzasakding cihthu ahihi. Khangno gamvaai ukten ngaih huai leh
thapiaktheihna aom leh piakhuai mahmah hi. Keizong hunkhat laai in WZC-EC ah
kapang ngei a $2,000 bang mahtawh ma kanapang ngeikhin hi. Makaai lamtekhat in
Zomi sang Chin kiciphot leeng cihkhat laaigelh ahihman in nasiatak kanial pah
leh EC sungpan onghawlkhia dildeel in atawp hilo napi ing ongkipaai ( Malay pau
leh Buang himai hi) Kawlgam ki-uk na sang bang khauhzawpian nong chiding hi.
Iminam sung ah hihbangte akisam mahmah khat in mu ing.
· Ingaklah mahmah Kawlgambup mikisimna Census mankhin
ziau a, 99% kisim khin ci in kumpi lamte in gen uhhi. ahizong in Code numbat te
leh kisim kik nading zong mun pawlkhat omlaai ahihman miphazah taangkokhiat
dingpeen kaal 6 bang sawt thei laaiding ci in kumpi lamten gen uhhi. Zogam sung
ah 150,000 bang in 914-Zomi kici ding in ki ummawh a dang nengneng tengbel
zumhuaiphial zahdong khat in tawm ci in kigen hi. Haupi khua ah zong 100%
914-Zomi ah khum cihthu kizaakbeh hi.
· Germany gam Berlin khuapi ah asisa Germany Prime
Minister luui Willy Brandt phawkna akipia Willy Brandt mihing te ngahding a
kilawmthute aseemte akipia minphatna Daw Aung San Suu Kyi April 11,2014 ni
in kipia a, thugenna zong kineisak hi.
Pi Suu in athugenna sung ah Kawlgam in Democracy ngahnaailo hi cihthu genkhia
hi.
· Kawlgam Yangon khuapi ah Kawlten kumsim abawl Tuibuah
pawi kumdangtawh kibanglo in nasiatak in bawlsawm uh ahihman in Kumpi lampan
micing ding palik 50,000 sehsa in nei hi
ci in April 11,2014 ni in genkhia uhhi. Kawlgam zong kolzawdeuh hiam tukum peen
kumdang sang in mipi lawpzaw ci in Mandat lampawl in genkhia uhhi.
· US gam I Cidamna lam Secretary aseemlaaitak Kathleen
Sebelius in April 10,2014 ni in anasep khawlsan ahihman in Preisedent Obama in
ama sum sazian leen ahi Slyvia Matthew Burwell
tawh laihding in ageelna April 11,2014 ni in taangkokhia hi. Mrs Sebelius peen Obama Care akihongtung
February khasung in Website hoihlohna hang in Republican party lampan napanmun
pan khawllel in aseemtheilo hiteh ci in asawl uh hia, President Obama in
iplahlaai ahihman in seemsak laai hi. Obama Care mipi 7.1 million in lei in
aupmawhzah uhsang gualzawhna kingah hi ci in President Obama in ataangkozawh
kaal khatna ah Mrs Sebelius in apanmun akhawlsan ahihi. Zomi ten etteh huai
kasa mahmah hi mipi ten ongdeihmeello cihkhawng itel leh ipil tateu tazong ei
le ei kitel a kihepding mipilte leh mikhangto te daan ahihi.
· USA gam California state San Francisco khuapi pan tai 140 gamlaatna Orland khuapi kiang ah Tan
12 sangnaupang apua sang Bus pikhat leh FedEx laaihawm Lorry pi nih April 10,2014 ni in kiphukha a mi 10 si hi. Sangnaupang 5 mawtaw hawl nih leh
adang 3 te hi a mi 30 vaal liam uh in Bus teng thum kaangtum hi.
· Australia gam Queensland tung April 11,2014 ni in
Cyclone huihpi in naikhat tai 140 tha tawh nawkgawp ahihman in Inn le lo tampi
sia in mi tampitak in mei neilo uhhi.
Asi aliamtawh kisai bangmah thupulaakna omnaailo phot hi.
· US President Obama I 2013 kumsum luut kumdangtawh
tehna in kiam mahmah a ahizong in kumpi tung siah tampiak mahmah hi ci in IRS
ten April 11,2014 ni in pulaakkhia uhhi. President Obama US kumpi te piak
khasum $400,000 hi a alaaibuman tawh akigawm 2013 kum asumluut vekpi $481,098
hi ci uhhi. Tualak ah President Obama in Federal Tax $98,169, Illinois state
Tax $23,328 pia a, cimawh huhna in $59,251 piakhia ahihman in 201 3 Tax Return
ngahbeh hituak hi. Nungkum in $608,611 ngah a
A President sepmasak kum in alaaibu bawl Dreams From My Father and The
Audacity of Hope cih khawng pha mahmah ahiman in kumsum luut $5.5million leh
khasum $400,000 ngah hi. Vice President Joe Biden abel 2013 kum $407,009 ngah
ah 23.7% Tax pia ci in White House ten April 11,2014 ni in pulaakkhia uhhi.
Adang President te tawh tehna in sumluut tawm mahmah uh a kiamtektek ahihman in
lamdang zong kisatek pian hi.
· Malaysia Vanleeng mang I thuciaptehna Black Box pan
aging hilimlim ding a upmawh awging kizataktak ta a amunlian kilim zon mahmah
hi. Ahizong in tuisung thuuk luamahmah ahihman in sawtmahmah laaiding khading
hi ci in Australia PM Tony Abbott in China gampan April 11,2014 ni in genkhia
hi.
· Ukraine gam nisuahna lam khuapi thum a om Kumpi zum
kheempeuh Russia tawh kigawmding a ut hiamtawi te in buluahkhin uha, Russia gam
tawh kipawlding mipitung ah thukimna laakna kanei nuam uh ci in ngen uhhi.
Ukraine kumpi lamte in April 11,2014 ni ma nathau uh khia a kisikkik in
nongluut uhleh mawhmaaina kongpiading uha, hih ni ma nongluutkei uhleh
ongnuaipaat mangding ci in thupia uh himah leh Hiamtawite lampan bangmah
dawnkikna neilo uhhi. Kumpi te ni ciangtanni tungta himah leh Hiamtawi tenlah
thaukhialo Ukraine kumpi lampan lah bangmah nasepna omnaaituanlo hi. Ukraine
gamnisuahna lam gamgi dung ah Russia gaalkaap 40,000 leh Vanleeng ,Tanks
gaalvan akicing omhi ci in NATO huihlak thukan manzaih pawl in April 11,2014 ni
in mukhia ahihman in patau simsim uhhi.
· Pope Francis in Naupang tung a mawhna abawl Phungzi te
ading in Vatican Radio pan April 11,2014 ni in mawhsuutna thuumna neihsak a,
Catholic pawlpi te zong naupangte keemcing a Phungzite zong khiallo ding aituam
thuumna theihsakna nei hi.
Tuni nasep tam ahihman ongziakaai kha hiing ee
ngaihdam bawm ah maw guai te ………….
Lungdam
ei
Thang
Khawm Pau Zomi
