Tulaai Leitung Thuthang tuamtuam updates Jan 8, 2014
Daw Aung San Suu Kyi Tedim khuapi pan Jan 8/2014 sun nai 12 in dingkhia a, Falam khuapi sun nai 2 pawl in tungto in Falam tualpi ah mipitung thugenna nei hi. Tedim ataam sung in NLD party vaai naakgending leh phatding in Zomi NLD pawl in lam en mahtase leh Pi Nu in Party mawk sihpih ngamsaang Party policy telding thupizaw a, NLD in Mualtungmite party tetawh kilang neih ngeiloding hi ci in gengiap ahihman in Zomi NLD pawl khakuncip uhhi.
Shan minim the party ahi SNDP ( sahang kaang party ) te in party khawmpi Muse khuapi ah Jan 7-9/2014 nithumsung bawl uha, 2015 kiteelciang luutding tawh kisai leh SNLD tawh kigawmna thu tawh kisai thu nam 7 thukimna Jan 9/2014 niciang suaikaai ding uhhi.
Malaysia gam a naseem Indonesia te ummang kawlgammi naseem 65 te cidam tak in alautaai napan un Kawlgam Yangon khuapi Jan 8/2014 ni in tungkim ta uhhi.
Japan gam Yokkaichi khuapi sung a om Mitsubishi sikthem neen bawlna company pi Jan 8/2014 ni in lam etloh pi in puakkham a, mi 5 asipah kimu in 12 naak liam mahmah in asi midangzong omlaai khading hi ci in AFP thuthang in thukin in taangkokhia hi.
H5N1 kici vasa natna lungno haang in Chinna gam pan aciah Canadian mikhat Jan 1/2014 ni in canada gam ah zato kipuak in ninih khitciang hi natna tawh si ahihman North America amasa peen hiding a North America a omte kidophuai hici in Canada Cidamna Vuanzi Rona Ambrose in Jan 8/2014 ni in genkhia hi.
Germany gam Hamburg khuapi ah lungphona nei mipi te leh palikte kikaal kibuai in lauhuaina lian mahmah ahihman in US gammi avaakkha te ID puakim ciatding leh ahihtheih leh vaakloh zawkding in US Embassy te in mipitung Jan 8/2014 ni in thupia uhhi.
Laaimal kikhial kha aomkhaak leh ngaihdam bawm ah maw
Thang Khawm Pau Zomi
