Thursday, January 16, 2014

Tulaai Leitung Thuthang Tuamtuam Updates Jan 15, 2014



Tulaai Leitung Thuthang Tuamtuam Updates Jan 15, 2014 

USA gamsung ah sumluut tawmte ading in Tuk tungding in kipan ta sumgim nam hiauhiau ta hi.Sum luut tamte leuleuciang sum liau khading hita ahihman in dip in pukpuk cipian leuleu in pawlkhat te bang in Receive kipaai khawng kaaikhawm thiamtiam ta uhhi. Jan 31 nipan IRS ten Tax Refund ngente saanna kipanding uha, April 15 ni khaakding uhhi. Tukum peen kumdang banglo in sum kingah baih mahmahding ci in IRS ten genkhia uhhi. Sumluut tam a liauding alau ten 501c(3) anei pawlpi ahih keh kipawlna gentehna: Zomi Innkuan USA ,Inc. te ah napia ziahziah in napiakzah uh laaitawh gelhsak le uhcin liau tawm mahmah ding hi ei..

Kawlgam sung ah sawtpi a ataamnuam gamdangmite ading in tukum sung in PR kici tawntung omtheihna angahthei nading un kihaanciam ding hi ci in Immigration Pu Khin Yi  in agenna Jan 14,2014 ni in Xianghua thukizaakna in genkhia hi. 

Japan gam ah Kawlgam mite utut a sungtum pusuak aomtheihnading in tuni Jan 15,2014 ni akipan Multiple-entry Visa kipia khia ziahziah ta hi ci in Japan Foreign Minister zumte in taangkokhia uhhi. 

Kawlgam Mualtungmi thautawi te leh Kawlgam kumpi kilemna bawlpawl Jan 25 ni Ba-an ah kimukhawmding a ageelsa uh February kha kaalmasa ah kisotto hi ci in Kawlgam kilemna phualpi te in Jan 15, 2014 ni in taangkokhia uhhi. Ahaang in Jan 20-22 sung KNU phualpi ah mualtungmi te kihona ommasa ding ci uhhi. 

Maaikaal sung ah Switzerland gam a kibawlding leitung gam tuamtuam makaaipi te sum le paai tawh kisai thukikup khopna ah Kawlgam President U Thein Sein va kihel ding hi ci in President zumpi te in Jan 15, 2014 ni in taangkokhia uhhi. 

Jan 14,2014 ni a kibawl Kawlgam Pithungsuh Hlutdaw khawmpi ah Kawlgam Gaalvil maagpi nihna Bu We Lwin in 2014-2015 sung gaalkaap te zatding in sum $2.3 Billion ngen a, pawlkhat te in Mualtungmite kaap nalelding in tuazahzah kisam hiam ci in buai ngeingai uhhi. 

Syria gam a gaaltaai micimawh te huhnading in UNO in huhna sum $6.5 billion azon nalak ah tu in leitung muntuamtuam  pan huhna $2.4 billion kamciam kingahta hi ci in Mr Ban Ki Moon in Jan 15,2014 ni in Kuwait gam a kibawl huhna piate kimuhkhopna ah genkhia hi. Hih huhna telak ah Kuwait ten Dollar Awn 500, USA ten Awn 380 piakhia ding hi ci in Mr John Kerry in genkhia hi. 

Jan 15,2014 ni in Israel Gaal vaanleeng te in Gaza gunbang to mun 5 busim to ziahziah uha, 
Al-qaeda migilo te thau kaaokisin na phualpi te leh  mun thupi tata zial to mang uhhi. Nung Sunday ni Jan 12 ni in Gaza pan Israel gam khanglam migilo ten na gaalkaap uh ahihman in Israel ten leiba lohna  a Gaza te onglot uh thautang ameettawh kalot kik uhhi ci in genkhia uhhi. 

USA gam Vanlam gaalkaap Nuclear lam cingte ulian mi 34 te kiheemna haangtawh anasepna pan un Jan 15,2014 ni in kikhawlsak phota, athu ala akician tak in kikantel saan hi ci in US gamdaal phualpi te in taangkokhia uhhi. 

Malaysia gam Malacca khuapi ah  Mr  Raja Noor Jan  kici kum 56 papi khat in amah leh amah kei Sultan Raja Noor Jan Shah Raja Tuah kahi cimawkmawk in kumpi puanteng silh lianluan kheem ahihman in Jan 14,2014 Tuesday ni in palik ten theikhia in man  uha, Jan 15,2014 Wednesday ni in thukhen sumpi ah puak uhhi. 

Kawlgam gaalkaap te in kiteelkhia kumpi ongkhankhit tumahmah in numei buanna thautangin zangsaan laai uha, hih thu tawh kisai lahpah theihding athu ala 100  vaal kakeem uhhi ci in Women League of Burma ten in BBC zang in leitung theiding in Jan 15,2014 ni in taangkokhia ek uhhi. 

India gam Delhi khuapi ah Khualzin lamkhial Danish nupi kum 51 dingkhat Jan 14,2014 ni in Temtawng angawng ah ngatsa in Pasal nih buan uha, tua abuan pasal nih te Delhi khuapi sung ah Jan 15,2014 ni in India palik ten manta ci in taangkokhia uhhi. 

RC Roman Catholic phualpi Vatican te in UN tekiang pan Phungzi te leh Naupang tul tampi te vang tuamtuam kinop mawhna tawh kisai thudotna thuakding hi ci in BBC in gelhkhia hi. Hih thu tawh kisai in Vatican in UN tung ah apianna mun ah abawlte tung thukhen un ci in anialsa uh ahihi. Nung kha December 2014 sung Pope Francis in Phunzi te vangtuamtuam te azataaknading uh leh khialh hetloh ding thu hanthawn dikdek khin hi. 

Iraq gam Bagdad khuapi laaizang ah Muslim namnih kikaal buaina haang in Jan 15,2014 ni in Bomb puakkham zihziah a mi 70 si in aliam kisim zolo hi ci in Iraq palik te leh zato te in genkhia uhhi. 


Laaimal kikhial a om leh ngaihdam bawm ah maw 

Thang Khawm Pau Zomi