Tulaai Leitung Thuthang Tuamtuam Update Jan 3, 2014
Kawlgam 2008 thukhunpi ahunzui, khuahun kihei tawh kituak in laihloh apha mawh ahihna leh Daw Aung San Suu Kyi leh NLD te 2008 thukhunpi phuahphat ding a ngetna te sangthei in hoih asakna thu Kawlgam President U Thein Sein in 1-2-14 mipi zaak in Radio pan taangkokhia hi.
Kawlgam sung namkee Mualtungmi thautawi kigawmkhawm pawlpi te in ongtungding January 20 pan nithum sung KNU te huangsung Law-Khi-La khua ah kawlgam kumpi tawh kilemnading tawh kisai thukikupna neikikding hi ci in thuvaaisai pawl in 1-2-14 ni in taangkokhia uhhi.
Kawlgam suahtaakna ngah akum 66 cinna phawkna in Kawlgam sung thong inn kheempeuh ah thongkia mite athongkiat zahding uh kikhiam ding hi ci in kumpi te neihsa thukizakna te in 1-2-14 ni in taangkokhia uhhi.
Kawlgam leh Thailand gam gamgi Thailand gamlam Ranawng khuapi sung ah 1/2/14 ni in Thailand gammi te leh Kawlgam mite kitawng uh ahihman in Thai palik te in Kawlgammi 150 ding man in gilbeem ah khum uhhi.
Kawlgam democracy makaai let NLD makaai Daw Aung San Suu Kyi January 6-10 Chin state sung ah khualzinding a, January 18,19 nisung Karen State sung zin Khatawp January 25 niciang Shan state sung cihbang in zinkawikawi in mipitetawh kimukhawmding hi ci in NLD zumte in 1/3/14 ni in taangkokhia uhhi.
Kawlgam sung State leh Division tuamtuam mun 15 ah gampua khualzinna Passport ngetna zum 1/2/14 ni in akituak in kihong kawikawi hi ci in Kawlgam kumpi te in taangkokhia uhhi. Adiak in state te ah Chin State,Shan State leh Kachin state, Sagaing Division cihte ah zong koih kawikawi uha, Ngaih hawh na Passport, Pilna sin nading passport, sumzon sum zuaknading passport cihbang dan in atuamtuam in nam 7 kingah thei ci uhhi.
Kawlgam 2008 thukhun pi sung a om President seemding te gamdang tawh ki meemat loding cih no.59 deihlohna haang in mipi 200 vaalding in 1/3/14 ni in Yangon khuapi ah lungphona nasia tak in nei in awng ziahziah mai uhhi.
Kawlgam suahtaak zawh kum 66 cin muakna in kawlgam President U Thein Sein thupiakna tawh thongkia mi 1,000 vaalding 1/3/14 ni in thong tuamtuam pan kikhahkhia ziahziah a, Kasiatna tawh gamvaai tawh thongkia ( Political Prisoner ) mi 3 bek ongkihel hi ci in VOA in genkhia hi.
India Prime Minister Manmohan Singh in 1/3/14 ni in Mipi tung leh thukan minthang tuamtuam tetung ah thusuahna, lungsim genkhiatna khat bawl a, Tukum beikuan India gam kiteelpi amanciang Prime Minister thakpa tung ah kaza ka-ap ding a tuakhit pan kipan gamvaai nasep kakhawlsan tading hi ci in genkhia hi.
China gam te in amasa peen Gaalvaan leng tampi apau Tembaw zatdaan in ni 37 sung China gam khanglam tuip tung ah asinna pan Buaina omhetlo in gualzo tak in akipat khiatna tembaw khawlmun cidam tak in 1/2/14 ni in tungkikta hi ci in Xianghua thukizaakna te in taangkokhia uhhi.
Gambeel gaaltaai mihing 1,065 gunkuang tawh tuipi tung a cimawh apai kawikawi nai 24 sung in gualzo tak in kahonkhia man uhhi ci in Italy palik te in 1/3/14 ni in taangko khia uhhi. Hih gambeel mi 1,065 te peen African, South Asian leh Middle East minam te hi ci in genbeh uhhi.
UK gamsung ahí England, Scotland ,Wales, Ireland gamsung teng ah huaisia tak in tusung teng tui khang a, 1/3/14 ni in Inn 100 vaal tui in tummang ahihban ah UK kumpi lam thuneite in hih huihpi leh guahpi nasia seemseem ding ahihman akuamaciat kidawm ding in 1/3/14 ni in kigin kholsakna thupia uhhi.
Laaimal kikhial kha aom khaak aleh ngaihdambawm ah maw
Thang Khawm Pau Zomi
