Saturday, December 28, 2013

Tulaai Leitung Thuthang tuamtuam updates December 27,2013



Tulaai Leitung Thuthang tuamtuam updates December 27,2013


Mawtaw accident haang in ongnusia Pa CIn Suan Lian 12/27/13 ni in Nashville khuapi ah Zomi Catholic Church te leh ZCF Nashville te makaihna tawh buaina omlo in leisung ah kituh thei hi. Hih sihvuina ah Zomi 300 kiim leh Khalkha lamte mi 18 kiim kihel thei a, alamdang mahmah in azi zong zato pan ongtuak thei in Haanmual dong ah misi kha thei hi. Nashville Zomi te kihuai zia picing kasa a, tui taanglo thuuk acih banglian uh ahihman etteh taak kasa mahmah hi.


Kawlgam sung Iraawady guun kabom khaktan China gam CPI company te in December 26 ni in thukante tung ah  hih Mitsong project kipatkik theihnading in 2015 kiteelkhit ongkahding kumpi te tawh kihoding ci uh hihman in kawlgam sung a mipite,kipawlna tuamtuam te in CPI deihlohna saanzawhlohna thute 12/27/13 ni in genziahziah in lungphonna nei litlit uhhi.


Japan gam Okinawa tuikulk  pangteng ah American tui gaalkaap phualpi nasia tak in hontheihnading USA leh Japan Defense minister pa ngetna Okinawa tuikulh Ukpi Hirokazu Nakaima  in 12/27/13 ni in phalna piata hi. Hih aphalna haang in Japan-USA gaalvaai kizopna kipseemseem ding baan ah Asia gamsung a USA te gaalpan phual kipsemsem ding ahihi.


Thailand gam saklam a asau peen Siklei tung khat pan 12/27/13 ni in Bus pikhat apai laai luisung ah kiasuk in atung atuang mi 29 thakhat in sipah in mi 5 nasia tak in liam  uhhi ci in Thailand gam saklam Ukpi Palik te in taangkokhia uhhi.


2014 kumthak kaal masa sung in Chin state sung ah  kawlgam 2008 thukhunpi koicihnuam cih mipi lungsim kaihkhopna kibawlding a tua mun ah kawlgam Democracy makaai leh NLD makaaipi Daw Aung San Suu Kyi vapai ding hi ci in asiavuanpa Dr Tin Myo Win 12/27/13 ni in genkhia hi.


Thailand leh Kawlgam gamgi zuul a om Maela gaaltaai khua 12/27/13 ni in meikaang a inn 100 kaangtum in mi 3 in meikaang liamna ngah uhhi. Meiphelh mawtaw nih thakhat thu in tungman bilbel ahihman in atamzaw kiphelh zo suak ci in Thailand thunei te in genkhia uhhi.


India leh kawlgam gamgi Tamu khuakiang kawlgam sunglam ah India kumpi te in Inn le lo lamding in kipan in leito ziahziah ta uh ahihman in Kawlpi khangno te  lungkimlo in mi 500 ding in 12/27/13 ni in nasia tak in lungphona nei uhhi.


INdia gam Khanglam Andhra Pradesh state sung ah 12/27/13 ni in Meileeng pi khat kaang a , mi  60 khualzin mi apuakna lak ah 23 asisa in kimu adangteng aliamtawh amangtawh kiciantak in kithei naailo hi ci in Andhra Pradesh state Meileeng lam thunei te in taangkokhia uhhi.


Libya gam kumpi thunei te in USA gaalkaap mi 4 Tripoli khuapi nitumna lam a om Sabratha khuapi ah mancip uha, banghang manhiam cih US kumpi in atel kan mahmah laaitak hi ci in US State Department spokeswoman Jen Psaki in 12/27/13 ni in genkhia hi.

Brazil gam khanglam  Espirito Santo leh  Minas Gerais stats sung ah Christmas zumkhaak sung in nasiatak in tuikhang a, mi 40 si in athulamdang mahmah in 12/27/13 ni in guahtheu ta in nitaang kimu hi ci in Brazil thuneite in taangkokhia uhhi. Hih guahtam hunsung in mipi 700,000 bang gaaltaai omman a, President Dilma Rousseff bang in Christmas nuamtak zangkha manlo ci hi.

INdia gam Delhi khuapi sung ah Christmas zanhah nizan in Pasal nih in NUngak kum 21 aphapan khat nabuan uha, abuan hiding a upmawh mi 10 palik ten amatkhit ban uhah 12/27/13 ni in aupmawh nunungpeen uh khat matbeh uhhi ci in Delhi palik te in genkhia uhhi. HIh thu haang in mipi te lungkimlo in lungphona nei uhhi.