Tulaai Leitung Thuthang Tuamtuam Update December 30,2013
Zomi sung ah Pasian gam leh Zomi te ading a makaai imuan isuan mahmah khat ahi Rev Pau Khan Khai te innkuan Louisville,Kentucky.USA ah Ph.D pilnasinding in January 10,2014 ni in Kawlgam Yangon khuapi pan-Taipei-USA dong ongleengsuak ding uha, 01/13/2014 ni in Kentucky state sung a om Zomi te tawh hun nuamtak ongzangkhawmding hi. Siapa te innkuan cidam a ongtun theihnading leh avaaikheempeuh ah agualzawh nading in thungetna ah phawkciat ni.
2014 Kawlgam Census ciang Zomi te minam khat a, ciamteh a m ikisim nasung ah adang minamte mahtawh kibang in ongsim khotheihnading ngimna tawh Yangon Khuapi a om Zomi te neihsa tuiphum biak innpi khat ah 12.30/13 ni in Zomi makaaite thukikupna nei uha, Khathak ah zong kawlpi kiim ah Zomi khangnote lom 14 in kikhen in Zogam sung ah Zomi-Census vaai kataangkoding uhhi ci in Pu Gin Kam Lian in RFA thukante kiang genkhia hi.
Kawlgam President U Thein Sein in leitung gamtuamtuam te tung ah akamciam ombang in 12/31/13 ni anunung peen Kawlgamsung a gamvaai tawh thongkia kheempeuh khahkhiat mangding in 12/30/13 ni in taangkokhia taktak ta hi.
Ongtungding January kha 1,2014 niciang suaktatak leh thupitak in Yangon khuapi ah Karen minam te a 76 veina Kumthak pawipi bawlding in geelna nei uha, atawmpeen mipi 10,000 bang kahding in kigginkholhna nei uhhi.
Kawlgam Irrawaddy haum Kanbeh khua ah 12/30/13 ni in khuasung meikatna piang a, Inn 200 vaal kangtum in minih naakliam a, mipi 1,000 in buknading teennading inn le lo neilo in ci mawh tak in khuasa uhhi.
Kawlgam leh Philippine gamnih kikaal ah Visa kisamnawnlo in 01/04/2014 ni pan kivaak hialhial theitading a, Philippine mite kawlgam sung Visa kisamlo in ni 14 ciang taamtheiding a, Kawlgam mite Philippine gamsung ah Visa kisamlo in ni 30 ciang taamtheiding hi ci in Philippine gampua vaaisai te in internet tung tawn in taangkokhia uhhi.
Russia gam khanglam a om Volgograd khuapi sung ah 12/29/13 ni in khatvei, 12/30/13 ni in khatvei akigawm nihvei amah le amah kisisak a bomb puakkhamsak migilo te nasepna haang in mi mi 31 si a, mi 57 nasiatak in liam uhhi.
Meitui vive apua Taikhat asau Meileeng khat USA gam North Dakota state ah 12/30/13 ni in kibung a meikaang ahihman in meileeng lamdung teng kheempeuh meikuang tawh kidim hi. Asi aliam kuamah omlo napin akiim apaam a om inn 300 kiimding thunei ten kiheemkhia ding in thupia uhhi.
Indonesia gam Suamthra tuikulh tung a om Mt Sinabung Meimualpi 12/30/13 ni in puakkhamding in kua vei kithawi ahihman in kumpi thuneite leh mipi te lauthawng mahmah in inn le lo te nusia in taaikeek mang uhhi. 12/30/13 ni in mipi 19,126 in inn le lo nusia in taaikeek mang uhhi.
Israel kumpi te in kamciamna ombang leh Palestinian tawh kilemtheihnading in Palestinian thongkia mi 26 te Israel gamsung pan 12/30/13 ni in suahtaak napia uhhi.
Laaimal kikhial kha aom khaak aleh ngaihdambawm ah maw
Thang Khawm Pau Zomi
