Tulaai Leitung Thuthang tuamtuam updates November 4, 2013

Tulaai Leitung Thuthang tuamtuam updates November 4, 2013

Pasian Vaangliana

November 3 ni alamdang  mahmah in zingsang pan kipan nitaakdong hun awng  ngahvetvetlo in Zomi te Pasian biakpiakna mun 3 ZMBC,ZPC( Nashville), ZCC ( Nashville) ah kakikhawm kha a, Khathak nipi nahi sawnsawn ahihman in Neekkhawm thumvei kane sawnsawn hi. Tua khitciang ko Kentucky pan kihawm a pai mi kakisim uhleh mi 3 kapha sawnsawn uha, Kapuan ang ka et leh 11-11-11 na kigelh sawnsawn hi. Kabiakna kangaihsun leuleu a, Thum gawm Pasian khat na hisawnsawn ahih man in 3 vive tawh kanitum tazen hi.

Nashville khuapi pan naikhat kipaian kakhua uh Bowling Green, Kentucky zuanding in Highway pi tung kamat phetleh kasathau thunding mangngilh kahihman in nasathau beita cih ka mawtaw in onglak hi. Lampialding  hileenglah asungnung peen tawn kahihman in mawtaw tammahmah ahihman in kineh theilo baan ah ka omna  pan sathau zuakna gamla mahmah ahihman in cihnading theilo in lam etbei in Topa nangthei in ci in thu kanget kawmkawm in lamnawllam kanehneh leh exit khat mubilbel in tua exit lamneu ah kapial leh sathau sai naompaklo sawnsawn in thungen kawmkawm in kapaipai leh Sathau saikhat mu in Topa hoihsiciamaw cikawmsa in sathau zuakna bul katunciang kasathau beilian hi. Pasian minthang tawntung ta hen.Amen

Zomi tawh kisai thuthang

·       Bowling Green Kentucky USA ah Khuado pawi nopcitak in 11/02/13 ni in kibawl a, Zin mang ding in kawlgampan Rev Dr Nang Sian Mung leh Lengtong Kam Khen te ongkihel thei uhhi.

·       Khuado pawi sung ah Khuado thu suutna, Lengtong Kam Khen thudotna, Zola pi phuah leh sak kidemna, Tan 12 zo te pahtawina, President Award ngahte pahtawina leh Zomi ten Khuado ciang kimawlna ineihsun ahih Sialkhau kisuhna, Lasak gualnopna tawh nuamtak in hun kizang zihziah hi.

·       Zola pi kidemna akhatna leh anihna ngahte, Sial Khau kisuh akhatna ngahte Tg Zogam Mungno in Beelkaangpi khatta leh Tuituamtuam ongpiaksak hi.

·       Anuai a YouTube ah Phuahtawm ngiat Zola ngumngeek, Sialkhau kisuhna te na en hamtang un.

Zola kidemna anihna late

http://www.youtube.com/watch?v=uF-7nH0Axoc&feature=youtu.be

Zola kidemna akhatna ngahte

http://www.youtube.com/watch?v=TuQBvK1RyhQ&feature=youtu.be

Sial Khau Kisuhna Final

http://www.youtube.com/watch?v=QjJrMEl4a8M&feature=youtu.be

·       Nashville Khuapi aom Zomi te pawlpi khat ahi ZPC pawlpi keem Sia Michael in MInam tuamtuam te puansilh leh thunget deih kaaikhawm in Israel gam ah thupha vadawhding cih Khasiangtho sawlna thukin ngah ahihman in akaihkhop laaitak hia, Khalkha lamte a ngahkimpianta in Zomi te a ngaaklaai hi.

·       Ongtungding November 30 Thanksgiving Day tawh kituak in Nashville Khuapi ah pawlpi kim Zomi kheempeuh in Khuadopawi nopcitak in bawlding uha tu in Zola, Ngeina Laam leh  Rock la te sin in khangno, Nupi Papi te buai mahmah uhhi.

·       Kawlpi khua a om Bethel Tuiphum pawipi ZBCM ah Crusade bawlding in USA gam Nashvilee Khuapi a om Zomi te pawlpi khat ahi Agape Mission Church pan akuan khia Rev Pau Lian leh alawm Mikaangta khat Kawlpi 11/03/13 ni in tungkhinta uhhi.

Kawlgamtawh kisai thuthangte

·       Kawlgam Rakhaing state pan Malaysia gamlam zuanding a pai Muslim gaaltaait mi 66 apua Tembawno khat 11/03/13 ni in Kawlgam tuipang ah kibung a mi 6 kihonkhia zo in 60 tuisung ah tumlum uhhi.

·       Kawlgam kumpi te leh kawlgam Mualtung mi thautawi kipawlna 17 te 11/04/13 ni in Kachin state Mitkyina khuapi ah kawlgambup kilempawi dingtawh kisai amasapeen thukikupkhopna kipanta uhhi. Mualtungmi thautawi lampan kawlgambup kilemna aomtheihnading in Federal ki uk bawlmasakding ngen ung ci in U Nai Han Tha in genkhia hi. Daw Aung San Suu Kyi in ahihleh alangnih in aut naak uhleh kilemmawhna omlo a utding thupi hi ci in 11/04/13 ni in genkhia hi.

·       Kawlgam Rakhaing state Sittwe khuapi pan tai 12 akigaamlaatna Pauhtaw khuahuam ah 11/04/13 ni in Muslim  leh Rakhaing minam kikaal buaina piangleuleu a, mi 3 si in tampitak liam uhhi.

Leitung gamtuamtuam thuthangte

·       Thailand gam I Prime Minister lui Thaksin aciahkiktheihnading thukhun thak ahaampi 11/01/13 ni in Thailand gam lower House pan thukimna aneihna Thailand gam mipi te lungkimlo uh ahihman in Bangkok khuapi sung ah 11/04/13 ni in lungphona nasiatak in nei uhhi.

·       Tukum kipatlam a thuneihna akilaaksak Egypt President Mohamed Morsi 11/04/13 ni in amasapeen thusitna kinei a, Keipeen thusitding leh matding kahikei a , kei ongmawk mat mihingteng namatding uhhi. Keipeen tu mahmah in zong Egypt President kahilaai hi ci in dawng ahihman in tawm vei thu akisitkhit ciang gilbeemlam ah kikhum kik phot hi.

Laai mal&ani akha kikhial kha aom leh ngaihdam bawm ah ong na khiatsak un maw

Thang Khawm Pau Zomi

http://buanli.blogspot.com